Кэмитиэт бэрэссэдээтэлэ Василий Местников киирии тылыгар өрөспүүбүлүкэ сокуонугар уларытыыны “РФ олохтоох салайыныыны тэрийии уопсай бириинсиптэрин туһунан” федеральнай сокуон эбээһинэстиирин туһунан ыйда. “Нэһилиэнньэлээх пууннартан тэйиччи сытар учаастактарга олохтоох дьаһалтаны кытары сибээстиир староста дуоһунаһын киллэрэри РФ ыксаллаах быһыы-майгы министиэристибэтэ ирдиир”, -- диэн бэлиэтээтэ.

 

Сокуоҥҥа киириэхтээх уларытыы туһунан өрөспүүбүлүкэ вице-премьерэ Михаил Гуляев иһитиннэрдэ. “Билэргит курдук, Саха сиригэр нэһилиэнньэлээх пуунтан ыраах аҕыйах киһи олорор учаастактара элбэхтэр. Куһаҕан суоллаах-иистээх, ыраах сытар буолан, бу пууннарга суһал быһыы-майгы таҕыстаҕына, сөптөөхтүк дьаһайар киһи суох. Нэһилиэк баһылыга күнүн аайы учаастактарга сылдьан, олох-дьаһах хаамыытын көрөр-истэр кыаҕа суох. Оттон федеральнай сокуон биһигиттэн маннык ойдом турар ыраах учаастактары салайар боломуочуйалаах киһини аныырбытын ирдиир. Ол киһинэн, сокуоҥҥа  этиллэринэн, староста буолар. Тыа сирин старосталарын үлэтин киллэрэр туһунан 2020 сылга диэри ылыныллыбыт РФ тыа сирин территорияларын сайыннарыы туһунан концепцияҕа этиллэр. Онно староста дуоһунаһын киллэрии нэһилиэнньэ олохтоох бэйэни салайыныы үлэтигэр кыттыһыытын быһыытынан ыйыллар”, -- диэн быһаарда Михаил Гуляев.

 

Сокоҥҥа уларытыыны киллэрии туһунан сокуон барылын ис хоһоонун билиһиннэрии кэнниттэн дьокутааттар ыйытыылары биэрдилэр. Сокуон барылын ордук Ил Түмэн вице-спикерэ Виктор Губарев утарда. Кини Михаил Гуляевтан староста үлэтин хайысхатын, хантан хамнастанарын туһунан ыйытта. “Старосталар уопсастыбаннай үлэһит быһыытынан сылдьыахтара. Кинилэргэ анал хамнас көрүллүбэт. Арай сокуон ыстатыйатыгар староста үлэтэ үбүнэн наҕараадаланыан сөп диэн суруллар. Оттон ханнык үлэни толорор диир буоллахха, староста олохтоохторун интэриэһин көмүскүүр, олохтоох дьаһалтаны кытары сибээстэһэр киһинэн буолар. Холобур, учаастакка суһал быһыы-майгы таҕыстаҕына, баһаар буоллун, буруйу оҥоруу таҕыстын, ас-үөл тиийбэтэ да буоллун, олохтоох дьаһалтаҕа кэмигэр этэн, кыһалҕаны быһаарар соруктаах. Кини муниципальнай үлэһитинэн, судаарыстыбаннай сулууспалааҕынан буолбат”, -- диэн эттэ. “Ол аата олохтоох бүддьүөт кинини үбүлүүр буоллаҕа. Олохтоох бүддьүөккэ онто да суох ноҕурууска сүктэрэбит, аны староста дуоһунаһын киллэрэбит дуо? Уопсастыбанньык быһыытынан үлэлиир диигит да, ким билигин босхо үлэлиэҕэй? Син биир үлэтигэр төлөбүр ирдэнэр. Этиҥ эрэ миэхэ, бу күҥҥэ диэри ити учаастактар старостата суох хайдах олорон кэлбиттэрэй. Тоҕо маннык үлэһити киллэрии эмискэ тирээтэ?” -- диэн вице-спикер салгыы ыйытта. Маныаха Василий Местников РФ сокуонугар сөп түбэһиннэрэн,  “СӨ олохтоох салайыныы туһунан” өрөспүүбүлүкэ сокуонугар уларытыы киллэрэр ирдэнэрин уонна аныгы олох-дьаһах тэйиччи сытар учаастактарга салайар боломуочуйалаах киһини аныырга тиэрдиэҕин эттэ.

 

Норуот дьокутаата Владимир Федоров сокуон барылын ис хоһоонугар өйдөммөт түгэннэр элбэхтэрин ыйда. Ол да буоллар кини староста дуоһунаһа туһалаах буолуоҕун туһунан эттэ. “Учаастактарга старостаны көрөр туһунан олохтоохтор бэйэлэрэ быһаардыннар. Олохтоох бэйэни салайыныы үлэтигэр нэһилиэнньэ кыттыахтаах, санаата учуоттаныахтаах диибит. Оччотугар мунньахтаан бэйэлэрэ быһаардыннар”, -- диэн этии киллэрдэ.

 

Мунньах түмүгэр дьокутааттар “СӨ олохтоох салайыныы туһунан” өрөспүүбүлүкэ сокуонугар уларытыы киллэрэр сокуон барылын бастакы ааҕыыга ылынар туһунан куоластаатылар.