Үөрүүлээх түгэҥҥэ Саха Өрөспүүбүлүкэтин Ил Түмэнин Бэрэссэдээтэлэ Александр Жирков, Саха Өрөспүүбүлүкэтин Конституционнай суутун бэрэссэдээтэлэ Александр Ким-Кимэн, Саха Өрөспүүбүлүкэтин Бырабыыталыстыбатын Бэрэссэдээтэлин солбуйааччы Алексей Дьячковскай,  Саха Өрөспүүбүлүкэтин Ытык сүбэтин сэбиэтин бэрэссэдээтэлэ Люлия Григорьева, Саха Өрөспүүбүлүкэтин Наукатын Академиятын президенэ Игорь Колодезников, Саха Өрөспүүбүлүкэтин профсоюзтарын  Идэлээх сойуустарын Федерациятын бэрэссэдээтэлэ Николай Дегтярев, Дьокуускай куорат баһылыгын солбуйааччы Евдокия Евсикова, В.В.Никифоров-Күлүмнүүр хос сиэнэ Альбина Никифорова, норуот депутаттара, судаарыстыбаннай сулууспа бэтэрээннэрэ, интеллигенция, культура уонна общественность бэрэстэбиитэллэрэ кытыннылар.

  

Спикер Александр Жирков XIX-XX үйэлэр кирбиилэригэр олорон ааспыт уһулуччулаах общественнай уонна политическай деятель, саха интеллигенциятын лидерэ, дириҥ өйдөөх идеолог, быраабы көмүскээччи, чинчийээччи, суруналыыс, суругу-бичиги, бэчээти, сырдыгы тарҕатааччы, саха литературатын, национальнай театрын төрүттэспит Василий Васильевич Никифоров-Күлүмнүүр туһунан тыл этэригэр саха бастакы интеллигенциятын лидерэ үтүө аата тиллибитин кэннэ бэрт кыра кэм ааспытын, икки сыллааҕыта Ил Түмэн дьиэтин иннигэр турбут пааматынньыгар сибэкки дьөрбөтүн ууруу сыллата үгэскэ киириэхтээҕин бэлиэтээтэ. Күлүмнүүр норуот өйүгэр-санаатыгар хаалар чаҕылхай, холобур буолар олоҕу олорбутун, үлэлээбитин аҕынна. Саха дьоно Василий Васильевич Никифоров-Күлүмнүүр уонна кини үөлээннэхтэрин ааттарын умнубакка үйэ тухары илдьэ сылдьыахтара диэтэ.  

 

Үтүө дьоммут сырдык ааттарын үйэтитии салҕанар. Александр Жирков сотору кэминэн XIX-XX үйэлэргэ ураты суолу-ииһи хаалларбыт саха бастакы интеллигенциятын туһунан кинигэ серията бэчээттэнэн тахсыаҕын сырдатта.

 

Салгыы спикер саҥа үүнэр көлүөнэ ыччат ураты болҕомтолоохтук, дириҥник ааспыт үйэҕэ олорбут, саха кэскилин уһансыбыт чулуу дьон туһунан үөрэтиэҕэ диэтэ. Бүгүҥҥү күҥҥэ мустубут дьоҥҥо, чуолаан эдэр ыччакка Ил Түмэн аатыттан махтанна. Василий Васильевич Никифоров-Күлүмнүүр  аата норуот өйүгэр-санаатыгар үйэлээхтик хаалыаҕар бигэтик эрэнэрин биллэрдэ.

 

Саха Өрөспүүбүлүкэтин Бырабыыталыстыбатын Бэрэссэдээтэлин солбуйааччы Алексей Дьячковскай сүдү киһиэхэ кэриэстэбил, ытыктабыл бэлиэтин, пааматынньыгар тыыннаах сибэкки дьөрбөтүн уураары туран: «Биһиги Василий Васильевич Никифоров-Күлүмнүүрүнэн сирэйдээн саха бастакы интеллигенциятыгар өрөспүүбүлүкэбит автономиятын турууласпыт дьоҥҥо барыларыгар сүгүрүйэбит», - диэн эттэ.

 

Саха Өрөспүүбүлүкэтин Наукатын Академиятын Президенэ Игорь Колодезников мустубут дьону Күлүмнүүр төрөөбүтэ 152 сыла туолбутунан учуонайдар ааттарыттан эҕэрдэлээтэ уонна үлэтэ өссө да ситэ үөрэтиллэ, сыаналана илигин, кини сахалартан бастакы этнограф-учуонай буоларын тоһоҕолоон эттэ. «Хомойуох иһин Василий Васильевич этнограф быһыытынан үлэтэ үөрэтиллэ илик. Түгэнинэн туһанан, эдэр ыччаты бу теманы болҕойон, үлэлэһэргитигэр ыҥырабын.  Мин саныахпар, дириҥ хорутуулаах дьоһун үлэ буолуоҕа», - диэн дьон болҕомтотун тарта.

 

Дьокуускай куорат баһылыгын солбуйааччы Евдокия Евсикова, Гуманитарнай чинчийии уонна аҕыйах ахсааннаах хотугу норуоттар проблемаларын институтун научнай үлэһитэ Пантелеймон Петров Василий Васильевич Никифоров-Күлүмнүүр олоҕун, үгүс өрүттээх үлэтин ахтан тыл эттилэр.     

 

Түмүккэ Василий Васильевич Никифоров хос сиэнэ Альбина Никифорова кэлбит дьоҥҥо махтанна. Ил Түмэн Бэрэссэдээтэлэ Александр Жирковка саха норуотун бастакы көлүөнэ интеллигенциятын аатын тилиннэриигэ үлэлэһэр үлэтэ үтүө түмүктээх буоларыгар баҕарда.

 

Саха норуодунай артыыһа Владимир Заболоцкай, Суорун Омоллоон аатынан Судаарыстыбаннай опера уонна балет театрын артыыстарын толоруутугар Иннокентий Сыроватскай тылларыгар Василий Парников музыкатыгар «Сүгүрүй, үс саха төрүөҕэ» ырыанан эҕэрдэлээтилэр. Мустубут дьон сүдү киһи пааматынньыгар тыыннаах сибэкки дьөрбөтүн уурдулар.