Бу күн Саха Өрөспүүбүлүкэтин Ил Түмэнин Бэрэссэдээтэлэ Александр Жирков Таатта улууһун нэһилиэктэрин бэрэстэбиитэллэрин, Дьокуускай куоракка олорор «Таатта» түмсүү кыттыылаахтарын, өрөспүүбүлүкэ тустаах тэрилтэлэрин салайааччыларын кытары көрүстэ. Көрсүһүүгэ Саха Өрөспүүбүлүкэтин Ил Дарханын уонна Бырабыыталыстыбатын дьаһалтатын салайааччытын солбуйааччы Евгений Савельев, Ил Түмэн тыа сиригэр уонна аграрнай политикаҕа  сис кэмитиэтин бэрэссэдээтэлэ Дмитрий Саввин, Саха Өрөспүүбүлүкэтин доруобуйа харыстабылын миниистирэ Михаил Охлопков, «Суут медицинскэй экспертизатын бюротун» салайааччыта Екатерина Колбина, Саха Өрөспүүбүлүкэтин Киин быыбардыыр хамыыһыйатын бэрэссэдээтэлин солбуйааччы Иван Андросов, Саха Өрөспүүбүлүкэтин тас сыһыаннааһыларга сибээһин департаменын салайааччыта Владимир Васильев, Таатта улууһун Октябрьскай нэһилиэгин баһылыга Михаил Аржаков, куоракка олорор Тааттаттан төрүттээх дьон -- Дьокуускай куорат Гагарин уокуругун управлениетын салайааччыта Руслан Платонов, «Таатта» түмсүү толорооччу дириэктэрэ Прокопий Турнин, президиум чилиэнэ Егор Борисов, «Ытык Күөл» уопсастыбаннай тэрилтэ бэрэссэдээтэлэ Альберт Соров, «Харбалаах» түмсүү салайааччыта Владимир Аржаков, «Туора Күөл» түмсүү бэрэссэдээтэлэ Иван Неустроев, «Чөркөөх» түмсүүттэн Людмила Богатырева, «Баайаҕа»түмсүүттэн Иннокентий Луковцев кыттыыны ыллылар. Кэпсэтии суол быһылааныгар суорума суолламмыт уонна эмсэҕэлээбит дьоҥҥо көмө оҥоруу, өйөбүл туһунан буолла.

 

Доруобуйа харыстабылын миниистирэ Михаил Охлопков, «Суут медицинскэй экспертизатын бюротун» салайааччыта Екатерина Колбина Ил Түмэн спикеригэр уонна мустубут дьоҥҥо быһылааҥҥа суорума суолламмыттарга сокуонунан ирдэнэр медицинскэй экспертизаны ыытыы, кимнээхтэрин быһаарыы, аймахтарыгар биэрии үлэтин туһунан уонна бу оһолтон эчэйбит билигин балыыһаҕа сытар үс киһи бүгүҥҥү туруктарын сиһилии кэпсээтилэр.

 

Дьокуускай куоракка олохтоох Таатта улууһуттан төрүттээх дьон түмсүүлэрин салайааччыта Иван Андросов, Октябрьскай нэһилиэк баһылыга Михаил Аржаков, «Чөркөөх» түмсүүттэн Людмила Богатырева, «Таатта» түмсүүттэн Прокопий Турнин, Егор Борисов, «Туора Күөл» түмсүү бэрэссэдээтэлэ Иван Неустроев улууска, нэһилиэктэргэ бу иэдээҥҥэ түбэспит дьоҥҥо көмө, атын даҕаны дьону-сэргэни долгутар боппуруостарга санааларын эттилэр. Куоракка олохтоох таатталар биир дойдулаахтарын кутурҕаннарын тэҥҥэ үллэстэн, хайа кыалларынан көмө оҥоро сылдьаллар.

 

Ол курдук Тааттаҕа улуус баһылыга Михаил Соров салайааччылаах анал хамыыһыйа тэриллибитэ. Суорума суолламмыт дьону тиһэх суолларыгар атаарыыга улуус, нэһилиэктэр салалталара, тэрилтэлэр, олохтоох нэһилиэнньэ ылсаннар үлэлии сылдьаллар. Сүтүктээхтэри, эмсэҕэлээбит дьону кытта дьиэ кэргэн уонна ыччат социальнай-психологическай көмөтүн киинэ, Ыксаллаах быһыы-майгы министерство управлениетын, психо-неврологическай диспансер психологтара үлэлэһэллэр. Таатта дьоно-сэргэтэ өрөспүүбүлүкэ салалтата анал бырабыыталыстыбаннай хамыыһыйа тэрийэн болҕомтотун уурбутугар махталын биллэрэр.

 

Саха Өрөспүүбүлүкэтин Судаарыстыбаннай Мунньаҕын Бэрэссэдээтэлэ Александр Жирков аатыгар Россия Федерациятын субъектарыттан өлбүт дьон дьиэ кэргэттэригэр, чугас дьонноругар дириҥ кутурҕаннарын тириэрдэр телеграммалар кэлитэлииллэр. “Маннык ыарахан түгэҥҥэ бары бииргэ түмсэн дьоммутугар күүс, өйөбүл буолуоҕуҥ. Өрөспүүбүлүкэ аатыттан суорума суолламмыт уонна эмсэҕэлээбит дьон дьиэ кэргэттэригэр көмө оҥоһуллуоҕа. Бу тэрээһиҥҥэ үгүс тэрилтэлэр, биирдиилээн дьон эмиэ кыттыһан эрэллэр. Манна эһиги бэйэҕит эмиэ кыттыһаҕыт. Ити сөптөөх. Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы Алексей Прокопьевич Дьячковскай салайааччылаах анал бырабыыталыстыбаннай хамыыһыйаҕа Ил Түмэнтэн Таатта-Томпо быыбардыыр уокуругун депутата Дмитрий Саввин киириэҕэ”, - диэн Александр Николаевич көрсүһүүнү түмүктээтэ. Суорума суолламмыт дьону тиһэх суолларыгар атаарыы сиэрэ-туома нэһилиэктэринэн ыытыллыаҕа.