Тэрээһиҥҥэ Саха Өрөспүүбүлүкэтин Ил Түмэнин Бэрэссэдээтэлэ Александр Жирков, Мэҥэ Хаҥалас улууһун баһылыга Николай Старостин, Россия Федерациятын үтүөлээх экономиһа, Саха Өрөспүүбүлүкэтин норуотун хаһаайыстыбатын үтүөлээх үлэһитэ Владимир Птицын, Саха Өрөспүүбүлүкэтин Бырабыыталыстыбатын Бэрэссэдээтэлин бастакы солбуйааччы Алексей Колодезников, Ил Түмэн сис кэмитиэттэрин бэрэссэдээтэллэрэ Юрий Баишев, Юрий Николаев, Александр Корякин, Владимир Прокопьев, Елена Голомарева, Саха Өрөспүүбүлүкэтин депутата Гаврил Алексеев, улуус депутаттарын Сэбиэтин бэрэссэдээтэлэ Андрей Находкин, Александр Романов кэргэнэ Елена Николаевна, аймахтара, чугас дьоно, бииргэ үөрэммит, үлэлээбит доҕотторо, министиэристибэлэр, тэрилтэлэр салайааччылара, биир дойдулаахтара кытыннылар.

 

Тэрээһин кыттыылаахтарын Саха Өрөспүүбүлүкэтин Ил Түмэнин Бэрэссэдээтэлэ Александр Жирков эҕэрэдэлээтэ.

 

“Киһи бэйэтин айылҕатынан талымас өйдөөх. Бүгүн хаһан даҕаны умнуллуо суох курдук көстүбүт түгэн, күн-дьыл аастаҕына, атын түгэннэргэ, быһылааннарга үтүрүйтэрэн, суолтата мөлтүөн, сүтүөн, умнуллуон сөп. Ааспыты барытын киһи кыайан тута сылдьыбат. Киһи бэйэтигэр ордук суолталааҕы, ордук чугаһы, көмөлөөҕү талан өйүгэр хатыыр, илдьэ хаалар”, -- диэн эттэ Ил Түмэн спикерэ.

 

“Биһиги сүтүкпүт олус соторутааҥҥы, кинини суохтаан бүтэ иликпит. Билигин даҕаны Ил Түмэҥҥэ: “Александр Афанасьевич ааммын тэлэччи аһан, күлбүтүнэн-үөрбүтүнэн киирэн кэлиэх курдук”, -- диэн депутаттар кэпсэтэллэр. Итинник өйдөбүл сытыы, чугас эрдэҕинэ Александр Афанасьевич туһунан санаа бастыҥ кылааннарын сүһэн ылан кэнэҕэски дьон билинэригэр, ылынарыгар, бэйэтигэр чугаһатарыгар көмөлөөх буоллун диэн санаанан бу кинигэ оҥоһулунна”, -- диэтэ Александр Жирков.

 

“Александр Афанасьевиһы биһиги хайдах ылынарбытынан инники өттүгэр дьон кинини өйдөөн хааллар диэн баҕа санаабытынан оҥоһуллубут кинигэ үйэлээх буоллун. Александр Романов аатын-суолун дьон-сэргэ өйдүү сырыттын, кини күлүм гынан ааспыт, биир дойдулаахтарыгар, төрөөбүт Сахатын сиригэр, норуотугар туһуламмыт олоҕо кэнэҕэспитигэр, ыччаппытыгар үтүө холобур буоллун”, -- диэн Ил Түмэн Бэрэссэдээтэлэ баҕа санаатын эттэ.

 

Александр Романов туһунан бэйэлэрин үтүө санааларын, ахтыыларын Мэҥэ Хаҥалас улууһун баһылыга Николай Старостин, улуус депутаттарын Сэбиэтин бэрэссэдээтэлэ Андрей Находкин, Ил Түмэҥҥэ бииргэ үлэлээбит доҕотторо - сис кэмитиэттэр бэрэссэдээтэллэрэ Юрий Баишев уонна Юрий Николаев, Саха Өрөспүүбүлүкэтин Бырабыыталыстыбатын бастакы солбуйааччы Алексей Колодезников, Саха Өрөспүүбүлүкэтин норуотун хаһаайыстыбатын үтүөлээх үлэһитэ Владимир Птицын, бииргэ үөрэммит, үлэлээбит доҕотторо эттилэр.

 

Бу күн Төхтүргэ Александр Афанасьевич сырдык кэриэһигэр анаммыт саахымакка, дуобакка уонна уксааҥҥа аһаҕас турнир буолла. Күрэхтэһиигэ Мэҥэ Хаҥаластан, Амматтан, Тааттаттан, Дьокуускай куораттан 55 спортсмен, ол иһигэр 3 спорт маастара уонна 22 спорт маастарыгар кандидат кэлэн оонньоото.