Саха Өрөспүүбүлүкэтин Ил Түмэнин Бэрэссэдээтэлэ Александр Жирков көҕүлээһининэн Саха сирин уустара өбүгэлэрбит туттубут ох сааларын чинчийэн үөрэтэн, сөргүтэн оҥорон, нэһилиэнньэҕэ киэҥник билиһиннэрэн эрэллэр. Маастар-кылаастары, семинардары, быыстапкалары тэрийэн ыыталлар. Олоҥхо ыһыаҕын тэрээһинигэр биллэр маастардар Николай Аржаков – Боло Уус, Роман Готовцев, Кирилл Петров, Павел Попов уонна да атыттар кытыннылар.

 

Күрэхтэһии бочуоттаах ыалдьыттарынан Ил Түмэн спикерэ Александр Жирков, Алдан оройуонун баһылыга Северин Поздняков буоллулар.

 

Өрөспүүбүлүкэтээҕи Баһылай Манчаары аатынан саха төрүт оонньууларын киинин дириэктэрэ, норуот депутата Иннокентий Григорьев күрэхтэһии аһыллыытыгар саха эр киһитэ былыр-былыргыттан ох саалааҕын, оннооҕор оноҕоһо 500 миэтэрэ ыраах көтөр ох саалар оҥоһулла сылдьыбыттарын, ити кистэлэҥэ уус маастарыстыбатыттан тутулуктааҕын бэлиэтээтэ. Бүлүүгэ былырыын буолбут Олоҥхо ыһыаҕар Ил Түмэн Бэрэссэдээтэлэ Александр Жирков көҕүлээһининэн аан бастаан ох сааҕа аналлаах быыстапка, күрэхтэһии тэриллибитин, оноҕоһо саамай ыраах 138 миэтэрэ 80 см кыырайан Николай Аржаков - Боло Уус бастакы миэстэ буолбутун аҕынна,кыттааччыларга ситиһиини баҕарда.

 

Күрэхтэһии кылаабынай судьуйата, Дьокуускай куорат оҕунан ытыыга старшай тренерэ Борис Олесов кыттааччыларга, көрөөччүлэргэ күрэхтэһии быраабылатын быһаарда. Быйылгы сылга оноҕос төһө ыраах тиийэн түспүтүн эрэ буолбакка, бэргэнник ытыы эмиэ аахсыллар диэн бэлиэтээтэ. 

 

Кыттааччылар бэйэлэрэ оҥорбут охторунан «куобах» быһыылаах сыалы аҕыстыыта ыттылар. Бэргэн ытааччынан өрөспүүбүлүкэ норуотун маастара, хомуһу оҥорууга аан дойду кылаастаах маастар Роман Готовцев, иккис миэстэҕэ өрөспүүбүлүкэ уус-уран оҥоһуктарын маастара, Сунтаар улууһуттан норуотун маастара Кирилл Петров, үһүс Уус Алдан улууһуттан норуотун маастара Семен Петров буоллулар.    

 

Маастардар салгыы ким оноҕоһо ыраах түһэригэр күрэхтэстилэр. Кирилл Петров оноҕоһо182 миэтэрэ 70 см кыырайа көтөн бастаата. Кини кэнниттэн ааспыт сыл күрэхтэһиитин кыайыылааҕа Николай Аржаков-Боло Уус - 175 миэтэрэ уонна Чурапчы улууһуттан норуот маастара Павел Попов 142 миэтэрэ 60 см көрдөрүүлээхтэр. Күрэхтэһии кыайыылаахтарыгар «Уйгу чорооно» кубоктар, мэтээллэр, харчынан сертификаттар, анал бириистэр туттарылыннылар. 

 

Норуот маастардара, уустар мустубут дьоҥҥо былыргылыы ньыманан оҥоһуллубут ох саалары көрдөрдүлэр. Көрүү түмүгүнэн бастакы Павел Попов, иккис Кирилл Петров, үһүс Николай Аржаков-Боло Уус миэстэ буоланнар, анал бириистэринэн бэлиэтэннилэр.  

Николай Аржаков – Боло Уус бу күрэхтэһиигэ ырааҕы ытыыга былырыыҥҥы көрдөрүүтүн тупсарбытын, инникитин ох сааны оҥоруу технологиятын маастардар баһылыылларыгар, кыттааччы ахсаана эбиллэригэр баҕа санаатын эттэ. Ох саа саха норуотугар улахан суолталааҕын, ол курдук ох сааны оҥорууга олоҕуран хомус, кырыымпа үөскээбиттэрин, онон өбүгэ үгэһин кэлэр көлүөнэлэргэ тиэрдиигэ, маастарыстыбаны чочуйууга болҕомто ууруллуоҕун туһунан эттэ.