Олоҥхо 10 сылын бэлэмнээн ыытар өрөспүүбүлүкэтээҕи Национальнай тэрийэр кэмитиэтин председателин Александр Жирков аатыгар кулун тутар 19 күнүгэр ЮНЕСКО Генеральнай директора Ирина Боковаттан "Аан дойду норуоттарын эпостара" диэн кинигэ сериятын таһаарыыны ЮНЕСКО өйүөн сөбүн биллэрэр харда сурук кэллэ.
 
Санатан эттэххэ, Александр Жирков Ирина Бокованы кытары Санкт-Петербург куоракка ахсынньы 7-9 күннэригэр Российскай Федерацияҕа Культура сылын түмүктүүр уонна Судаарыстыбаннай Эрмитаж олохтоммута 250 сылыгар ананан  ыытыллыбыт III норуоттар икки ардыларынааҕы культурнай форум кэмигэр көрсүбүтэ. Көрсүһүүгэ Александр Жирков норуоттар икки ардыларынааҕы культурнай сыһыаннаһыылары сайыннарыыга улахан өҥөтүн иһин ЮНЕСКО-ҕа махталын тиэрдибитэ уонна Ирина Бокова±а "Аан дойду норуоттарын эпостара" диэн кинигэ сериятын таһаарыыны ЮНЕСКО эгидатыгар ылары туруорсубута.
 
ЮНЕСКО генеральнай директорын аатыгар сурукка спикер Александр Жирков 2014 сыл сэтинньитигэр ЮНЕСКО-ны кытары бииргэ ыытыллыбыт өбүгэлэрбит улуу айымньыларын атын норуоттар тылларыгар тылбаастаан, аан дойдуга тиэрдэр сыаллаах-соруктаах бырайыактара түмүктэнэн, "Дьулуруйар Ньургун Боотур" олоҥхо кыргызтыы, оттон кыргыз "Манаһа" сахалыы, ааспыт сылга олоҥхо английскайдыы тылынан тылбаастанан тахсыбыттарын, Саха Республиката ЮНЕСКО-ҕа эпическэй нэһилиэстибэни харыстааһыҥҥа, үөрэтиигэ уонна тарҕатыыга туох үлэни ыыппытын туһунан отчуотун ыыппытын туһунан иһитиннэрбитэ. Салгыы ити сурукка Олоҥхо 10 сылын бэлэмнээн ыытар өрөспүүбүлүкэтээҕи Национальнай тэрийэр кэмитиэт көҕүлээһининэн "Аан дойду норуоттарын эпостара" диэн кинигэ серията олохтоммутун, серияҕа ЮНЕСКО эгидатынан аан дойду улуу эпостара хардарыта тылбаастанан тахсыахтарын, норуоттар икки ардыларынааҕы редакционнай коллегия тэриллиэҕин сөбүн туһунан этиллибитэ.
 
Бу күннэргэ ЮНЕСКО культура боппуруостарыгар Генеральнай директорын солбуйааччы Альфредо Перес де Арминьянтан "Аан дойду норуоттарын эпостара" диэн кинигэ сериятынан аан дойду улуу эпостара хардарыта тылбаастанан тахсыыларын ЮНЕСКО өйүөн сөбүн биллэрэр хардата кэллэ. Сурукка ЮНЕСКО бэйэтин эгидатыгар ыларыгар наадалаах бары ирдэбиллэргэ эппиэттиир докумуоннары өрөспүүбүлүкэтээҕи Национальнай тэрийэр кэмитиэт толорон ыытыахтааҕын туһунан этиллэр. Ирдэбил быһыытынан өрөспүүбүлүкэтээҕи тэрийэр кэмитиэт английскай уонна французскай тылларынан сайаапканы, РФ ЮНЕСКО дьыалаларыгар национальнай Хамыыһыйата өйүүрүн туһунан суругу холбоон ыытыахтаах. РФ ЮНЕСКО дьыалаларыгар национальнай Хамыыһыйатын эппиэттиир секретара Григорий Орджоникидзе Хамыыһыйа Саха сирин ити көҕүлээһинин өйүүргэ бэлэмин биллэрэр суруга эмиэ кэллэ. Онон бу күннэргэ Олоҥхо Национальнай  кэмитиэтэ Саха Республикатын Федеративнай сыһыаннаһыыларга уонна тас дьыалаларга министерствотын кытта туһааннаах докумуоннары бэлэмнээн ыытыахтара.
 
 
Ил Түмэн пресс-сулууспата