Дьахталлар аан дойдутааҕы күннэринэн!
 
Саха Республикатын народнай депутаттарын аатыттан эһигини сандал саас салаллан иһэринэн итиэннэүтүө үгэскэ кубулуйбут бырааһынньыгынан -- Дьахталлар аан дойдутааҕы күннэринэн эҕэрдэлиибин!
 
Дьахтар олоҕу бэлэхтиир, сиэри-майгыны тутуһууну, дьиэ кэргэҥҥэ эрэллээх сыһыаны харыстыыр, алаһа дьиэ сылааһын, этэҥҥэ буолуутун түстүүр аналлаах. Бүгүн биһиги киниэхэ айылҕаттан амарах сыһыанын, оҕолорун уонна чугас дьоннорун тустарыгар сыралаах кыһамньытын, бэриниилээх тапталын уонна эрэлин иһин истиҥ махталбытын тиэрдэбит. Саха сирин дьахталлара алаһа дьиэ далбар хотуттара эрэ буолбакка, кинилэр бүгүҥҥү күҥҥэ республика салалтата духуобунаһы тилиннэриигэ, дьиэ кэргэни уонна чөл куттаах олоҕу өйөөһүҥҥэ ыытар үлэтигэр быһаччы уонна көхтөөхтүк кытталлар.
 
Республика Үрдүкү Сэбиэтин Президиумун салайааччылара Софья Сидорова, Мария Нартахова, Александра Овчинникова, Евдокия Горохова уонна Люлия Григорьева  -- кинилэр бары тыа сиригэр төрөөн-үөскээн тахсыбыттара уонна бэйэлэрин уһулуччу кыахтарынан, күүстээх дьулуурдарынан, көхтөрүнэн, республика дьонун-сэргэтин олоҕун тупсарар баҕаларынан үрдүк чыпчааллары ситиспиттэрэ, бар дьон махталын ылбыттара. Билигин Саха Республикатын бэһис ыҥырыылаах Ил Түмэнигэр 11 дьахтар-парламентарийдар ситиһиилээхтик үлэлии-хамсыы сылдьаллар.  Сокуону таһаарар үлэ сүрүн суолталаах хайысхата -- дьиэ кэргэни өйөөһүн. Республика Ил Түмэнэ оҕо уонна ийэ бырааптарын харыстааһыҥҥа, доруобуйа харыстабылыгар уонна онтон да атын хайысхаларга кэккэ сокуоннары, тосхоллору оҥорон ылыммыта. Ити үлэ салҕанар.
 
Бу күн хас биирдии дьиэ ахсын тапталлаах ийэлэрин, эдьиийдэрин, балыстарын, кэргэннэрин итиитик-истиҥник эҕэрдэлииллэр. Баҕарабын эһиэхэ алаһа дьиэ сылааһын, бары саҕалааһыннаргытыгар ситиһиилэри, чугас уонна күндү дьоҥҥут истиҥ сыһыанын, дьолу-соргуну! Этэҥҥэ буолуҥ!
 
Александр Жирков,
Саха Республикатын Государственнай Мунньаҕын
(Ил Түмэнин) Бэрэссэдээтэлэ