Саха Республикатын народнай депутата, Государственнай Мунньах (Ил Түмэн) тутууга уонна дьиэҕэ-уокка, коммунальнай хаһаайыстыбаҕа сис кэмитиэтин бэрэссэдээтэлэ Николай Костромин балаҕан ыйын 23-24 күннэригэр Таатта улууһун Дьохсоҕон нэһилиэгэр сырытта. 

Депутат Борообулга Саха сирин биир уһулуччулаах политическай деятелэ Ананий Андреев төрөөбүтэ 110 сылыгар аналлаах тэрээһиннэргэ кытынна.

Ананий Кононович Андреев бэйэтин кэмин чулуу уола, ол гынан баран кини сырдык аата билигин киэҥ араҥаҕа үчүгэйдик биллибэт. Сахалартан маҥнайгы инженер-энергетик.

Кини 1901 сыл балаҕан ыйын 23 күнүгэр Саха АССР Таатта улууһун I Дьохсоҕон нэһилиэгэр төрөөбүтэ. 1920-1921 сс. — Таатта улууһугар продразверстка болномочунайа. 1922–1923 сс. — РКП(б) Бүлүүтээҕи бюротын сэкирэтээрэ. 1923 сылга — РКП(б) Саха обкомун тэрийэр отдел инспектора. 1923-1924 сс. — Дьокуускай уокурук исполкомун бэрэсэдээтэлэ. 1924-1925 сс. — Саха АССР Үпкэ наркоматын нолуокка салалтатын сэбиэдиссэйэ. 1925-1926 сс. — ВЦИК Лаамытааҕы уратылаах хамыыһыйатын сэкирэтээрэ, «Якутторг» Охотскай куораттааҕы факториятын дириэктэрэ. 1926–1928 сс. — Свердлов аатынан коммунист университетын устудьуона. 1928-1929 сс. — ВКП(б) Дьокуускайдааҕы уокуругун сэкирэтээрэ. 1929–1931 сс. — Саха АССР ЦИК уонна Совнарком бэрэссэдээтэлэ. 1931-1936 сс. — Сталин аатынан Бүтүн Союзтааҕы Промышленнай Академия үөрэнээччитэ. 1936-1937 сс. — Дьокуускайдааҕы электростанция дириэктэрэ. 1937-1938 сс. — Саха АССР коммунальнай хаһаайыстыбаҕа наркома. 1938 сыллаахха репрессияламмыта. 1940 сыллаахха ыам ыйыгар үрдүкү миэрэҕэ тардыллыбыта, кэнники уһун болдьоххо хайыыга ыытыллыбыта. 1944 сыллаахха өлбүтэ. Реабилитацияламмыта.

Ил Түмэн пресс-сулууспата