Ытыктабыллаах Сахам сирин олохтоохторо!
 
Саха Өрөспүүбүлүкэтин Ил Түмэнин аатыттан эһигини Улуу Кыайыы 69-с сылынан истиҥник  эҕэрдэлиибин!
 
Кыайыы күнэ – сэрии толоонугар уонна тыылга төрөөбүт дойдубутун өстөөхтөн көмүскээбит аҕа дьоммут үрдүк ааттарыгар сүгүрүйэр, Ийэ сир туһугар ыар кэмҥэ биир ньыгыл кэккэҕэ түмсүбүт улуу дойдубут норуоттарынан киэн туттар ытык күммүт. Дьон-норуот өйүгэр-санаатыгар Аҕа дойду Улуу сэриитин ыар сүтүктээх уонна өрөгөй үктэллээх умнуллубат күннэрэ, сэрии толоонугар охтубуттар, сураҕа суох сүппүттэр сырдык өйдөбүллэрэ умнуллубаттар.
 
Саха сирин 60 тыһыынчаттан тахса чулуу ыччаттара Аҕа дойду уоттаах сэриитигэр кыттан, Москва, Ленинград, Сталинград куораттары көмүскээбиттэрэ, Курскай Дугаҕа, Старай Руссаҕа, Арҕаа фронт былаһын тухары сэриилэспиттэрэ, Берлины ылсыбыттара. Европа дойдуларын фашистартан босхолооһуҥҥа, милитаристскай Японияны үлтүрүтүүгэ кыттыспыттара. Сэриигэ барбыттартан 40 тыһыынча кэриҥэ биир дойдулаахтарбыт ахтылҕаннаах Сахаларын сиригэр төннүбэтэхтэрэ.
 
Республика дьоно-сэргэтэ “Барыта -- фронт туһугар! Барыта – Кыайыы туһугар!” диэн күүстээх үлэҕэ туруммута, тоҥору-хатары, хоргуйары аахсыбакка, хара көлөһүнүнэн Дойду көмүскэлигэр уу харчынан, түүлээҕинэн, көмүһүнэн, аһынан-үөлүнэн, итии таҥаһынан, сэрии сэбинэн-сэбиргэлинэн сөҕүмэр көмөнү оҥорбута. Саха сирин олохтоохторо Арҕаа фроҥҥа икки танковай колоннаны, бойобуой самолеттар эскадрильяларын оҥотторон ыыппыттара.
 
Күндү бэтэрээннэр! Саха сирин олохтоохторо! Биһиги норуоппут уоттаах сэриигэ хорсун быһыытынан, эйэлээх олоҕу тутууга бэриниилээх үлэтинэн биһиги барыбыт киэн туттабыт.
 Ис сүрэхпиттэн эһиэхэ барыгытыгар чэгиэн доруобуйаны, уһун үйэни, чугас дьоҥҥутугар этэҥҥэ буолууну баҕарабын. Улуу Кыайыы күнүнэн!
 
Александр Жирков, Саха Республикатын Государственнай Мунньаҕын (Ил Түмэнин) Бэрэссэдээтэлэ