Көрсүһүүгэ  өрөспүүбүлүкэ народнай депутаттара Александр Уаров, Дмитрий Саввин, Юрий Баишев, Елена Голомарёва, Пётр Аммосов, Александр Слепцов, Юрий Михайлов, Михаил Габышев, Уус-Алдан улууһун баһылыга  Алексей Федотов, өрөспүүбүлүкэ тыатын хаһаайыстыбатын уонна аска-үөлгэ политикатын министрин солбуйааччы Николай Афанасьев, РФ Үлэ Геройун коллегалара, биир дойдулаахтара, аймахтара итиэннэ Ил Түмэн аппараатын үлэһиттэрэ кытыннылар.

 

Тэрээһин саҕаланыытыгар 2014 сыл ыам ыйын 1 күнүгэр Кремльгэ “Российскай Федерация Үлэ Геройа” кыһыл көмүс мэтээллэри туттарыы сиэриттэн-туомуттан быһа тардыыны көрдөрдүлэр.  Онно Российскай Федерация  Президенэ Владимир Путин саха Геройун туһунан бу курдук эппитэ: «Михаил Николаевич Готовцев төрөөбүт дойдутугар үлэлиир, олоҕун устатыгар сүөһү иитиинэн дьарыктанар. Манна туох да күүркэтии суох. Кини биэс саастааҕыттан ийэтигэр фермаҕа көмөлөһөр киһи буолбута. 16 сааһыттан колхуоска үлэлээбитэ. Ленинградтааҕы ветеринарнай институт кэнниттэн дойдутугар кэлбитэ. Үрдүк көрдөрүүлэрин иһин сэбиэскэй кэмҥэ Үлэ Албан аата уордьан толору кавалера буолбута. Оттон бүгүҥҥү күҥҥэ кини тэрийбит фермерскэй хаһаайыстыбата ситиһиилээхтик үлэлиир, онон Россияҕа сүөһү иитиитин итиэннэ Саха Өрөспүүбүлүкэтигэр сүөһүнү иитэр комплексы сайыннарыыга уонна бигэ туруктаах оҥорууга тус кылаатын киллэрэр.

 

Өрөспүүбүлүкэ парламенын спикерэ Александр Жирков Ил Түмэн аатыттан итиэннэ САССР Үрдүкү Сэбиэтин, Судаарыстыбаннай Мунньах (Ил Түмэн) ветераннарын ааттарыттан  М.Н. Готовцевы киниэхэ Российскай Федерация Үлэ Геройун үрдүк аата иҥэриллибитинэн эҕэрдэлээн туран,  Ил Түмэн Бэрэссэдээтэлэ ыам ыйын 1 күнүгэр Россия  Президенин Владимир Путин илиититтэннаҕарааданы ылыы ураты суолталааҕын бэлиэтээтэ: « Биһиги бүгүн, Саха сирин эрэ буолбакка, бүтүн Дальнай Восток федеральнай уокуругун үрдүнэн бастакынан судаарыстыба уонна норуот иннигэр үлэтинэн уһулуччу үтүөлэрин иһин Российскай Федерация Үлэ Геройун үрдүк аатын ылбыт Михаил Николаевич Готовцевычиэстиибит.   Михаил Готовцев Үлэ Албан аата уордьан толору кавалера, өрөспүүбүлүкэ норуотун хаһаайыстыбатын үтүөлээх үлэһитэ, ааспыт сылга Саха Өрөспүүбүлүкэтин Бочуоттаах гражданинынан буолбута.

 

Александр Николаевич Социалистическай үлэ Геройун аата 1938 сыллаахха олохтонуоҕуттан 1991 сылга диэри ити үрдүк наҕараадаҕа норуот хаһаайыстыбатын араас салаатын 20 тыһыынчаттан тахса үлэһитэ тиксибитин туһунан кэпсээтэ. Ити бочуоттаах аат 1991сыллаахха ССРС сууллуутун кытта тэҥҥэ суох буолбута. Россия Президенэ Владимир Путин бу ааты 2013 сыл кулун тутарыгар сөргүппүтэ. Парламент спикерэ этэринэн, өрөспүүбүлүкэ 73 олохтооҕо Социалистическай үлэ Геройун аатын сүкпүтэ, олор ортолоругар Михаил Готовцев икки биир дойдулаахтара – Уус-Алдан улууһуттан аатырбыт ыанньыксыттар Елизавета Ивановна Бурцева уонна Анастасия Семёновна Копырина. «Михаил Готовцев кинилэр бачыымнарын иилэ хабан ылбыта – биир ыанар ынахтан биэс тыһыынчаттан тахса лиитэрэ үүтү ыабыта», - диэн туран, спикер Павел Шарин, Владимир Михайлов, Владимир Пестряков, Пролетарий Панфилов, Егором Жирков курдук, үрдүк көрдөрүүлэри ситиспит ыанньыксыттарынан Саха сирин дьоно-сэргэтэ киэн туттарын бэлиэтээтэ:  «Кинилэр хотугу сиргэ үүт хайысхатынан сүөһү иитиитинэн ситиһиилээхтик дьарыктаныахха сөбүн дакаастаабыттара. Ол иһин Михаил Николаевич наҕараадата –кини бииргэ үлэлээбит дьонун, өрөспүүбүлүкэ сүөһү иитээччилэр барыларын, Саха сирин тыатын хаһаайыстыбатын бүттүүнүн наҕараадата”, - диэтэ спикер.

 

 Бу күн Ил Түмэн тыа сиригэр уонна аграрнай политикаҕа сис кэмитиэтин председателэ Дмитрий Саввин РФ Үлэ Геройун аатынан наҕараадаламмыт Михаил Готовцевы икки төгүл эҕэрдэлээтэ: Ил Түмэҥҥэ уонна өрөспүүбүлүкэ Тыатын хаһаайыстыбатын уонна аска-үөлгэ политикатын министерствотыгар ыытыллыбыт көрсүһүүлэргэ. «Үлэ Геройун үрдүк аата – эдэр көлүөнэҕэ үтүө холобур уонна сиэр-майгы тускула. Боростуой ыанньыксыт үлэнэн кыайыыта Россияҕа үрдүктүк сыаналанна, саха үлэһитин, XXI үйэ Геройун аата, ону сэргэ саха норуотун бүттүүнүн аата Россияҕа бүтүннүүтүгэр билиннэ. Михаил Готовцев – норуот киэн туттуута, кини биһиги хотугу өрөспүүбүлүкэбит аатын-суолун үрдэттэ. Саха сирин бүттүүнэ кини ситиһиилэринэн уонна наҕараадаларынан киэн туттар», - диэн туран, норуот депутата Ил Түмэн тыа сиригэр уонна аграрнай политикаҕа сис кэмитиэтин Бочуоттаах грамотатын туттарда.

 

Ил Түмэн Хонтуруоллуур кэмитиэтин бэрэссэдээтэлэ Александр Уаров  Михаил Готовцевы икки бүк Геройунан ааттыахха сөбүн бэлиэтээтэ: «Михаил Николаевич Үлэ Албан аата уордьан толору кавалера буолбута, итинник уордьаны Герой аатыгар тэҥнииллэр».

 

Уус-Алдан улууһун баһылыга Алексей Федотов этэринэн, Уус-Алдан улууһун сирэ үлэ геройдарынан баай дойду. Ол курдук ааспыт сылга өрөспүүбүлүкэ общественноһа бастакы Социалистическай үлэ Геройа Елизавета Бурцеватөрөөбүтэ 100 сылын бэлиэтээбитэ, бу сылга -- Российскай Федерация  Геройа Михаил Стрекаловскай, “Бочуот знага” уордьан кавалера Ирина Олесоватөрөөбүттэрэ 100 сылларын туолаллар.

 

Саха АССР культуратын үтүөлээх үлэһитэ, Уус-Алдан улууһун Курбуһах нэһилиэгин уонна Дьааҥы улууһун бочуоттаах гражданина Дмитрий Пухов  Танда нэһилиэгэ, сэбиэскэй кэмҥэ ааттыылларынан Кыһыл Танда, Сахабыт сирин тас өттүгэр киэҥник биллэр-көстөр ааттаах-суоллаах уһулуччулаах дьоннор төрөөбүт дойдуларынан буоларын бэлиэтээтэ. Александр Жирков  Д. И. Пухов “Саха сиринуһулуччулаах дьоно” сериянан Михаил Николаевич Готовцев  олоҕун уонна айымньылаах үлэтин туһунан кинигэни таһаарар туһунан этиитин өйөөтө.

 

 Өрөспүүбүлүкэ тыатын хаһаайыстыбатын уонна аска-үөлгэ политикатын министрин солбуйааччы Николай Афанасьев Российскай Федерация Үлэ ГеройаМихаил Николаевич Готовцев чиэһигэр министерство быйыл сайын «Герой Ыһыаҕын» ыытары бэлэмниирин туһунан иһитиннэрдэ.

 

Саха Өрөспүүбүлүкэтин Үрдүкү Сэбиэтин XII ыҥырыытын Бэрэссэдээтэлэ, ССРС Үрдүкү Сэбиэтин XII ыҥырыытын народнай депутата, Ил Түмэн үс ыҥырыытын народнай депутата Климент Иванов, “Хотугу сулус” уордьан кавалера Павел Шарин Үлэ Геройугар эҕэрдэ тылларын этэн туран, киниэхэ бастыҥ баҕа санааларын тиэртилэр.

 

 Михаил Готовцев төрөөбүт дойдутугар итиитик-истиҥник эҕэрдэлии көрсүбүттэригэр махтанан туран, сүөһү иитиитигэр үлэлии сылдьар үгүс дьон үлэтин түмүгэр кини Үлэ Геройун үрдүк аатыгар тиксибитин бэлиэтээтэ. Кини селекцоннай үлэнэн дьарыктанан, олоҕун бүтүннүүтүн сүөһү боруодатын тупсарар үлэҕэ анаабытын туһунан кэпсээтэ. Ленинградтааҕы ветеринарнай институкка ылбыт билиитэ-көрүүтэ улахан көмөлөөх буолбут. 1992 сыллаахха «Удьуор» бааһынай хаһаайыстыбатын тэриммит. «Мин бэйэм иннигэр биир ынахтан элбэх үүтү ыыр сыалы туруоруммутум. Боруоданы уонна сүөһү элбэх үүтү биэрэр хаачыыстыбатын тупсарар туһуттан голштино-фризскай боруода атыыр оҕустар сиэмэлэринэн буоһатар буолбутум. Бу боруода биһиги сэмэнтээр ынахтарбытын буоһатыыга олус табыгастаах”, -- диэн кэпсиир кини. Михаил Николаевич селекциялаан таһаарбыт үүттээх ынахтара – селекционер-энтузиаст  30 сыллаах сыралаах үлэтин түмүгэ.

 

 «Голштино-фризскай кыһыл эриэн уонна хара эриэн боруода атыыр оҕустар көмөлөрүнэн үүт хайысхалаах сүөһү боруодатын тупсарар наада. Атын регионнартан биирдии ынаҕы 80-тан 100 тыһыынчаҕа тиийэ солкуобайга атыылаһар оннугар, ынахтары 30-40 солкуобайдаах таблеткаларынан буоһаппыт быдан ордук. Оччоҕо Саха сирэ Россия атын регионнарыттан хаалсыа суоҕа”, -- диэн эттэ Российскай Федерация Үлэ Геройа Михаил Николаевич Готовцев.

 

Бары тыл этээччилэр Михаил Николаевичка бэйэни харыстаммат дьулуурдаах үлэтин иһин махтанан тураннар, инники үлэтигэр өссө үрдүк ситиһиилэри, кытаанах доруобуйаны баҕардылар.