Парламент спикерэ Александр Жирков: «Бу күннэргэ Саха сирин парламена бырабыыталыстыбаны кытта бииргэ бүддьүөт бырайыагын сүрүн кээмэйдэригэр Ил Түмэн депутаттарын этиилэрин учуоттуур сөбүлэһиннэрэр хамыыһыйалар састааптарын бигэргэтиэҕэ. Сокуон барылын бастакы ааҕыыга көрүү уһаабытынан, ити хамыыһыйалар үлэлэрин эрдэттэн саҕалыы тураллара ордук. Бүгүн биһиги өрөспүүбүлүкэ общественнай институттар бэрэстэбиитэллэрин этиилэрин истибэтэхпит хомолтолоох, үгэс курдук, парламент уонна бырабыыталыстыба кэпсэтиилэрэ буолла. Ханныгын да иһин, Саха сирин парламена бүддьүөт сокуонун барылын көрөр күннээҕи үлэтигэр ылыста”, -- диэтэ.

 

Оттон Юрий Николаев этэринэн, үс сыллаах бүддьүөт барыла РФ Президенэ ыам ыйыгар таһаарбыт Ыйаахтарыгар эппит сүрүн соруктарын толорууга туһуланыа. “Бу – бүддьүөт эйгэтин үлэһиттэрин хамнастарын үрдэтии, хаарбах дьиэлэртэн дьону көһөрүү, оскуола иннинээҕи саастаах оҕолор тэрилтэлэрин дьиэлэрин тутуу. Итини таһынан өрөспүүбүлүкэ инники күөҥҥэ тутар соруктарын, Ил Дархан Ыйаахтарын толоруу үлэлэрэ күүтэллэр. Биһиги иннибитигэр ити уонна онтон да атын соруктары толорорбут эрэйиллэр. Сэтинньи 26 күнүгэр бүддьүөт үс сыллаах барыла бигэргэтиллиэхтээх. Бүддьүөт барылын көрүү чэрчитинэн, биһиги маннык хайысхаларынан үлэлиир бөлөхтөрү тэрийэри былааннаатыбыт: социальнай политика, судаарыстыбаннай салайыы, промышленность, транспорт, тыа хаһаайыстыбата уонна балыктааһын, итиэннэ, инвестиционнай тосхолго туспа бөлөҕү”. Сис кэмитиэт бэрэссэдээтэлэ кэмчилэммит үп саппааһын булууга, көдьүүһэ суох ороскуоттары сарбыйыыга, баар үбү инники күөҥҥэ тутуллар соруктары толорууга аттаран биэриигэ сокуон барылын иккис ааҕыыга ураты болҕомтону ууран үлэлииргэ ыҥырда. Бүгүҥҥү күҥҥэ сокуону көҕүлээччилэр өттүлэриттэн киирэр этиилэргэ судаарыстыбаннай бүддьүөт ороскуоттуур чааһын туох да төрүөтэ суох үрдэтии, хантан үбүлэнэрин ыйбакка эрэ этии суох буолуохтаах. Сис кэмитиэт өрөспүүбүлүкэ үбүн саамай сүрүн докумуонугар көдьүүстээх үлэ барыа диэн эрэнэр.

 

Өрөспүүбүлүкэ экономикаҕа министрэ Валерий Максимов 2015-2017 сылларга өрөспүүбүлүкэ социальнай-экономическай сайдыытын барылын туһунан дакылааты иһитиннэрдэ. Туһааннаах сокуон барылыгар өрөспүүбүлүкэ үпкэ министрэ Валерий Жондоров дакылааттаата.

 

Норуот депутаттара Анатолий Добрянцев, Виктор Губарев, Александр Уаров, Владимир Прокопьев, Евгения Михайлова, Алена Атласова, Елена Голомарёва, Иван Андреев, Александр Романов, Юрий Баишев дакылааччыттарга сүүрбэттэн тахса ыйытыылары биэрдилэр. Ити ыйытыылар үгүстэрэ сүрүннээн “Мин Сахам сирэ -- XXI үйэҕэ” өрөспүүбүлүкэтээҕи үтүө дьыала хамсааһыныгар көрүллэр үбүлээһиҥҥэ, “Элбэх квартиралаах дьиэлэр ырыынактара удамыр буолуутун үрдэтии” хос тосхолу (“Пилотнай бырайыагы”) салгыы олоххо киллэриигэ, тыа хаһаайыстыбатын бородууксуйатын атыга барар сыанатын үрдэтиигэ, хоту сиргэ олох таһымын тупсарыыга, төгүрүк тулаайах оҕолору уонна төрөппүт көрүүтэ-истиитэ суох хаалбыт оҕолору олорор дьиэнэн хааччыйыы тэтимин оннунан хаалларыыга сыһыаннаахтар.