Госдума пленарнай мунньаҕар 2014 сыл сэтинньи 12 күнүгэр  “Российскай Федерацияҕа социальнай-экономическай өттүнэн урутаан сайдыы сирдэрин туһунан” федеральнайсокуон (ТОСЭР) ылыллыбытынан сибээстээн, «Российскай Федерация Нолуокка кодексыгар уларытыылары киллэрии туһунан”  623885-6 №-дээх федеральнайсокуонбарылын РФ Дальнай Восток сайдыытыгар министрин солбуйааччы Кирилл Степанов иһитиннэрдэ. 

 

Бюджекка уонна нолуокка Кэмитиэт чилиэнэ Раиса Кармазина оҥорбут хос дакылаатыгар федеральнай сокуон бу барылын өйүүргэ эттэ.

 

Санатан эттэххэ, сокуон барыла Российскай Федерацияҕа социальнай-экономическай өттүнэн урутаан сайдыы сирдэрин резиденнэригэр нолуогу төлөөһүҥҥэ ураты чэпчэтиилэри көрөр. Докумуоҥҥа ТОСЭР резидент- предприятиеларыгар сүрүн ирдэбиллэр суруллубуттар. Бастатан туран, юридическай сирэйдэр урутаан сайдыы сиригэр-уотугар регистрацияланыах тустаахтар, урутаан сайдыы сиригэр-уотугар тэрилтэ бэйэтин састаабыгар туспа подразделениены тэриниэ суохтаах. Итини таһынан, тэрилтэ нолуок анал режимин туһаныа суохтаах; нолуогу төлөөччүлэр консолидированнай бөлөхтөрүн ахсааныгар киирэрэ көҥүллэммэт. ТОСЭР-га үлэлиэхтээх  резидент-тэрилтэ коммерциянан дьарыктаммат тэрилтэ, баан, страховой тэрилтэ, судаарыстыбаннай буолбатах пенсионнай фонда, сыаналаах кумааҕы ырыынагын идэтийбит кыттааччыта, клиринговай тэрилтэ, ханнык баҕарар көрүҥнээх оһуобай экономическай зона резиденэ буолуо суохтаах. 

 

Социальнай өттүнэн урутаан сайдыы сирдэрин резиденнэрин статуһун ылбыт тэрилтэлэргэ барыыстарыттан тутуллар нолуокка чэпчэтиллибит ставканы олохтуур туһунан этиллэр. Сир баайын хостооһуҥҥа нолуок ставкатын уон сыл устатыгар нуултан бииргэ диэри кээмэйинэн намтатар коэффициены туттарга этэллэр.

 

“Российскай Федерацияҕа социальнай-экономическай өттүнэн урутаан сайдыы сирдэрин туһунан” федеральнай сокуон ылыллыбытынан сибээстээн, «Российскай Федерация Нолуокка кодексыгар уларытыылары киллэрии туһунан”  федеральнай сокуон барылын ылыныы РФ субъектарыгар баар нолуогунан хабыллар базаларын намтатыа суоҕа, тоҕо диэтэххэ, сокуон барылынан киириэхтээх ити нуормалар саҥа тэриллиэхтээх предприятияларга сыһыаннаахтар. 

 

Дакылааччыттарга ыйытыылары Судаарыстыбаннай Дуума депутаттара Валентин Романов, Иван Абрамов, Алексей Корниенко биэрдилэр. Докумуону дьүүллэһии кэмигэр парламентарийдар Андрей Крутов уонна Константин Лазарев тыл этэн кытыннылар. 

Түмүккэ Госдума “Российскай Федерацияҕа социальнай-экономическай өттүнэн урутаан сайдыы сирдэрин туһунан” федеральнай сокуон (ТОСЭР) ылыллыбытынан сибээстээн, «Российскай Федерация Нолуокка кодексыгар уларытыылары киллэрии туһунан”  федеральнай сокуон барылын бастакы ааҕыыга ылынна. Госдума бу барылга көннөрүүлэри уонна этиилэри биир күн иһигэр эрэ ылыаҕа. 

 

Итини сэргэ Ил Түмэн  Госдумаҕа сокуон барылын көрүү иннинэ ити барылын төттөрү ыҥырар туһунан суругу ыыппыта. Онно этиллэринэн, Саха сирин парламентарийдара ТОСЭР-га бэйэ дьыалатын аһан үлэлииргэ үчүгэй усулуобуйалары тэрийэр туһугар “Российскай Федерацияҕа Дальнай Востокка  уонна социальнай-экономическай өттүнэн урутаан сайдыы сирдэрин уонна Российскай Федерация атын сирдэрин туһунан” федеральнай сокуон барылын инники редакцияларыгар быһаарыллыбыт нолуокка чэпчэтиилэри уонна социальнай төлөбүрдэри оннунан хаалларары итиэннэ    Российскай Федерация Нолуокка кодексыгар уонна РФ атын сокуоннарын актарыгар  уларытыылары киллэрии наадатын бэлиэтээбиттэрэ.

 

Санатан эттэххэ, сокуон барылын инники редакцияларыгар табаары (үлэни, өҥөнү) батарыыга эбиллибит сыанаҕа нолуок ставкатыгар «нулевой» бырыһыаны олохтуур туһунан этиллэр.