М.Аммосов аатынан Хотугулуу-Илиҥҥи федеральнай университет саха тылын үрдүк үөрэҕэ тэриллибитэ 75 сылыгар аналлаах дьоро киэһэ Суорун Омоллоон аатынан опера уонна балет театрыгар буола турар. Тэрээһиҥҥэ Саха республикатын Правительствотын председателин солбуйааччы Алексей Дьячковскай, Ил Түмэн наукаҕа, үөрэххэ, култуураҕа, сонуну киэҥник тарҕатар ситимнэргэ уонна уопсастыбаннай тэрилтэлэр дьыалаларыгар сис кэмитиэтин председателэ, норуот депутата Антонина Григорьева, Хотугулуу-Илиҥҥи федеральнай университет ректора Евгения Михайлова, тыл институтун директора Гаврил Филиппов, институт выпускниктара, студеннар кыттыыны ыллылар.
Ил Түмэн аатыттан эҕэрдэ тылы Антонина Григорьева тиэртэ: Саха сиригэр төрүт тылбытыгар үрдүк үөрэхтээх специалистары бэлэмнээһин 1934 сыллаахха педагогическай институт тэриллиэҕиттэн саҕаламмыта. Бу сыллар тухары үрдүк үөрэх кыһатын бүтэрбит выпускниктар билигин саха республикатын араас муннуктарыгар үүнэр көлүөнэ ыраастык, табатык төрөөбүт тылынан саҥарарыгар кыһамньылаахтык, түбүктээхтик уонна үтүө түмүктээхтик үлэлии сылдьаллар. Наука киэҥ эйгэтигэр хоҥнохтоохтук ылсан, дириҥ хорутуулаахтык үлэлииллэрэ саха аатын үрдэтэр. Сахабыт тылын тюрк тыллаах омуктардыын ханыылаан, тэҥнээн үөрэтии профессор Николай Антоновтан саҕалаан сайдан барбыта. Онтон бу кэнники сылларга Герасим Левин сүҥкэн үлэлэри хаалларда. Киэҥ билиилээх, учууталлар учууталлара Николай Дьячковскай, Сардаана Егинова ааттара умнуллубат. Билигин даҕаны биһиги үтүө-мааны, киэн туттар дьоһун учуонайдарбыт Гаврил Филиппов, Иван Алексеев, Василий Илларионов, Василий Протодьяконов, Евдокия Поликарпова, Степан Колодезников уо.д.а. ситиһиилээхтик үлэлии сылдьаллар.
Тыл сайдыытыгар программа Ил Түмэн нөҥүө сылын аайы бигэргэтиллэр. Саха сирин Правительствота, Ил Түмэн төрөөбүт тылбыт сайдыытыгар улахан болҕомтотун уурар. Бүгүҥҥү тэрээһин да ону туоһулуур. Бу күннэргэ саха тылын үрдүк үөрэҕэ тэриллибитэ 75 сылыгар аналлаах араас тэрээһин ыытылынна. Олортон биирдэстэрэ Соҕуруу Корея, Турция, Москва, Санкт-Петербург, Казахастан тюрк омук тылын үөрэтиигэ биллиилээх тыл үөрэхтээхтэрэ кыттыылаах научнай-практическай конференция буолар.
Инникитин даҕаны төрөөбүт тылбыт сайдыытын туһугар үлэҕит ситиһиилэрдээх буоллун. Күн аайы сахалыы ыраастык, табатык саҥарарга үөрэтэр үлэҕит өссө даҕаны ситиһиилэнэ турдун. Төрөөбүт тылбыт сайдар саҕахтара саппаҕырбатыннар!
Норуот депутата Антонина Григорьева сис кэмитиэт бочуоттаах грамоталарын М.Аммосов аатынан Хотугулуу-Илиҥҥи федеральнай университет РФ хотугулуу-илиҥҥи норуоттарын тылларын уонна культураларын институтун саха тылын стилистикатын уонна нууччалыы, сахалыы тылбааһын кафедратын старшай преподавателигэр Лидия Сековаҕа уонна институт саха тылын кафедратын доценыгар Дария Чиркоеваҕа туттартаата.
Ил Түмэн пресс-сулууспата
Опубликовано: 5 декабря, 2014 - 18:53
Заметили ошибку в тексте? Выделите ее и нажмите Ctrl+Enter, чтобы сообщить об этом администратору.
Спасибо!
Спасибо!