Ил Түмэн сир сыһыаннаһыыларыгар, айылҕа баайыгар уонна экологияҕа сис кэмитиэтин председателэ Владимир Прокопьев кулун тутар 12 күнүгэр кэмитиэт иһинэн уу биологическай баайын боппуруостарыгар үлэлиир экспертиир бөлөх  «Балыктааһын туһунан” федеральнай сокуон барылын дьүүллэһэр мунньаҕын салайан ыытта.
 
Сис кэмитиэт председателэ Владимир Прокопьев Госдума бу сокуон барылын 2013 сыл ахсынньытыгар бастакы ааҕыыга ылыммытын бэлиэтээтэ. Госдума айылҕа баайыгар, айылҕаны туһаныыга уонна экологияҕа кэмитиэтэ ааспыт сыл устатыгар элбэх үлэни ыытан, барылы оҥорууга үлэлиир уонна экспертиир бөлөхтөр үлэлииллэр. Госдума туһааннаах кэмитиэтин чилиэнэ Эльнура Глубоковская салайар үлэлиир бөлөҕө бу сыл олунньу 5 күнүгэр Госдума кэмитиэтин көрүүтүгэр сокуон барылын бэлэмнээн киллэрбит. Итини сэргэ сокуону көҕүлээччилэртэн 150-ча кэриҥэ этиилэр киирбиттэр, ол иһигэр Саха Республикатын парламена иккис ааҕыыга көннөрүүлэри киллэрэр уонча этиилэрэ бааллар. Ааспыт сыл ахсынньытыгар РФ Правительствота барылга көннөрүүлэри киллэрэр 20 этиитин киллэриитин Владимир Прокопьев: “Ити этиилэр, мин көрүүбэр, федеральнай сокуон барылын төрдүттэн уларытар ис хоһоонноохтор”, -- диэн эттэ.
 
Владимир Прокопьев уонна сис кэмитиэт председателин солбуйааччы Василий Власов Госдума Кэмитиэтин үлэлиир бөлөҕүн мунньаҕар араас кэмнэргэ кыттаннар, Саха сирин парламенын көрүүтүн уонна этиилэрин ылыннарыылаахтык тиэрдии түмүгэр, Госдума айылҕа баайыгар, айылҕаны туһаныыга уонна экологияҕа кэмитиэтэ «Балыктааһын туһунан” федеральнай сокуон барыла ситэ-хото оҥоһуллубакка эрэ ылыллыыта тохтообута бэлиэтэннэ. “Сокуон барыла маннык ситэ оҥоһуллубатах көрүҥүнэн ылылыннаҕына, көмөлөһүөхтээҕэр, буортулуон сөп”, -- диэн Владимир Прокопьев Госдума туһааннаах кэмитиэтинсалаайааччытыгар В.И.Кашиҥҥа бэйэтин позициятын этэн турар. Онон хаалбыт кэмҥэ Ил Түмэн сокуон барылыгар өссө этиилэри бэлэмнээн, ырытан ылынан баран, Госдума туһааннаах кэмитиэтигэр киллэрэрэ эрэйиллэр.  
 
Госдума айылҕа баайыгар, айылҕаны туһаныыга уонна экологияҕа кэмитиэтэ «Балыктааһын туһунан” федеральнай сокуон барылыгар Саха сирин парламенын аатыттан ханнык этиилэри киллэрэр сөптөөҕүн тула кэпсэтиилэргэ РФ балыктааһыҥҥа Өлүөнэтээҕи территориальнай управлениетын салайааччыта Олег Кузьмин, “Якутрыбвод” федеральнай тэрилтэ салайааччыта Петр Артамонов, СР Арктика дьыалаларыгар Госкомитет бэрэстэбиитэлэ Олег Михальскай, Хотугу сир прикладной экологиятын научнай институтун үлэһитэ Евгений Иванов, сис кэмитиэт чилиэннэрэ, норуот депутаттара Василий Власов, Елена Голомарева, Иннокентий Васильев кытыннылар.
 
Сокуон барылыгар этиилэри бэлэмнээн оҥоруу туһунан этэригэр Владимир Прокопьев  СР Арктика дьыалаларыгар Госкомитетыттан, РФ балыктааһыҥҥа Өлүөнэтээҕи территориальнай управлениетыттан, “Якутрыбвод” федеральнай тэрилтэттэн уопсайа үс этии баарын туһунан иһитиннэрдэ. Сис кэмитиэт председателэ экспертиир бөлөх чилиэннэрин кытта сүбэлэһэн баран, Госдума айылҕа баайыгар, айылҕаны туһаныыга уонна экологияҕа кэмитиэтин председателин Владимир Кашин, Россия Тыатын хаһаайыстыбатын уонна аска-үөлгэ политикатын министерствотын ааттарыгар бу сокуон барылыгар Россия уонна республика правительстволарын позицияларын тиэрдэри туруорсар ис хоһоонноох суруктары бэлэмнээн ыытар наадатыгар, иккиһинэн, республика этиилэрин икки варианын бэлэмнээн оҥоруу үлэтигэр тохтоото. “Ааспыт мунньахха бастакы вариант туһунан кэпсэтэн турабыт. Дьүүллэһиллэр сокуон барылыгар боломуочуйалары субъектарга биэрии туһунан этиилэр киириэхтэрин наада”, -- диэн туран Владимир Прокопьев мунньах кыттыылаахтарыгар бу өттүгэр барылга үчүгэй этиилэри бэлэмнээһиҥҥэ хаалбыт кэмҥэ күүскэ үлэлииргэ ыҥырда.
 
Мунньахха бэлиэтэммитинэн, балыгы промышленнай сыалга бултааһыҥҥа анаммыт учаастактартан ураты учаастактарга дьон бэйэтин наадыйыытыгар балыктыылларын көҥүллүүр балаһыанньалар киириэх тустаахтар. Онон ити этиллибит хайысхаҕа «Балыктааһын туһунан” федеральнай сокуон барылыгар сис кэмитиэт иһинэн уу биологическай баайын боппуруостарыгар үлэлиир экспертиир бөлөх чилиэннэрэ аныгыскы мунньахха республика олохтоохторун интэриэстэрин туруулаһар этиилэри бэлэмнээн аҕалан, дьүүллэһиэх буолан сүбэлэстилэр.
 
Ил Түмэн пресс-сулуспата