Ил Түмэн бэрэссэдээтэлин солбуйааччыта, Олоҥхо уон сылын бэлэмнээһиҥҥэ уонна ыытыыга Саха сирин национальнай тэрийэр кэмитиэтин бэрэссэдээтэлэ Александр Жирков Саха Өрөспүүбүлүкэтин бырайыактарын билиһиннэрии тэрээһиннэрин чэрчитинэн Парижка ЮНЕСКО штаб-квартиратыгар ЮНЕСКО материальнайа суох нэһилиэстибэ боппуруоһугар сүбэһитин, Чибо (Япония) университетын профессора Норико Айкаваны кытта көрүстэ.
 
Норико Айкава ЮНЕСКО өй-санаа баайын салаатын дириэктэринэн үлэлии сылдьан 2001 сыл атырдьах ыйыгар Сибиир уонна Дальнай Восток регионыгар төрүт култуураны уонна фольклору харыстааһын туһунан ЮНЕСКО (1989) мэктиэлэрин толорууга Аан дойдутааҕы семинарга кыттыыны ылбыта. Бу семинарга саха норуотун сэдэх эпическэй баайын харыстааһыҥҥа, үөрэтиигэ уонна тарҕатыыга саҥа дьаһаллары, ол иһигэр аан дойду таһымыгар ылыныы туһунан Саха Өрөспүүбүлүкэтин научнай общественноһын уонна  Бырабыыталыстыбатын баҕа санаата аан бастаан этиллибитэ.
 
Александр Жирков Олоҥхо уон сылын бэлэмнээһиҥҥэ уонна ыытыыга Саха сирин национальнай тэрийэр кэмитиэтин уонна «Олоҥхо Ассоциациятын» аатыттан олоҥхону киһи аймах өйүн-санаатын тылынан шедевринэн биллэриигэ анаан өрө таһаарыыга Саха Өрөспүүбүлүкэтин бастакы саҕалааһыннарын өйөөбүтүн иһин Норико Айкаваҕа махтанна.
 
Саха сирин парламенын вице-спикера «2007-2015 сылларга саха героическай эпоһын олоҥхону харыстааһын, үөрэтии уонна тарҕатыы» судаарыстыбаннай тус сыаллаах тосхол чэрчитинэн олоҥхону харыстааһыҥҥа, үөрэтиигэ уонна тарҕатыыга өрөспүүбүлүкэҕэ ыытыллар үлэ туһунан кэпсээтэ.
 
Хотун Норико Айкава Саха Өрөспүүбүлүкэтин салалтата уонна дьоно-сэргэтэ олоҥхону харыстааһыҥҥа туруулаһыылаах үлэлэрин үрдүктүк сыаналаата уонна өрөспүүбүлүкэ учуонайдарыгар, дьонугар-сэргэтигэр, «Олоҥхо Ассоциациятын» чилиэннэригэр бары үтүөлэри баҕарарын тириэртэ. Кини Саха сирин олохтоохторугар эпическэй баайы харыстааһыҥҥа тулуурдаах, дьулуурдаах буолалларыгар уонна бары ситиһиилэри баҕарда. Норико Айкава 2001 сыллаахха Саха сиригэр кэлэ сылдьан саха фольклорун күүһүн уонна муудараһын билбитин уонна кэлин ЮНЕСКО Генеральнай секретара Контиро Мацуура салалтатынан үлэлии сылдьан саха эпоһын аан дойду таһымыгар таһаарыыга төһө кыайарынан көмөлөспүтүн туһунан эттэ.
 
Көрсүһүү түмүктэниитигэр Саха сирин парламенын вице-спикера Александр Жирков хотун Норико Айкаваҕа Саха Өрөспүүбүлүкэтин Ил Түмэнин бэрэссэдээтэлин махталын уонна үрүҥ көмүс өйдөбүнньүк мэтээли туттарда.
 
Саха Өрөспүүбүлүкэтин Ил Түмэнин наҕараадатын туттарыыга Саха сирин делегациятыттан федеральнай сыһыаннаһыыларга уонна тас сибээстэһиигэ миниистир Валерий Максимов, Е. Ярославскай аатынан Хоту дойду норуоттарын култууратын уонна историятын музейын директора Егор Шишигин, М.К.Аммосов аатынан ХИФУ омук филологиятын уонна регионнары үөрэтэр институтун директора Ольга Мельничук, федеральнай сыһыаннаһыыларга уонна тас сибээстэһиигэ министерствотын судаарыстыбаннай боротокуол отделын салайааччыта Ким Борисов кытыннылар.
 
Ил Түмэн пресс-сулууспата