Бу кыһалҕаны төрдүттэн көннөрөр туһугар «Биир ньыгыл Арассыыйа» политическай партия Череповецкай куоракка буолан ааспыт регионнар икки ардыларынааҕы конференцияларыгар РФ Бырабыыталыстыбатын бэрэссэдээтэлэ Владимир Путин тыа сиригэр үлэлии барбыт 35-гэр диэри саастаах эдэр эмчиккэ хас биирдиилэригэр 1 мөл. солк. судаарыстыба өйөбүлүн быһыытынан биэриэҕин туһунан этиитэ дьон-сэргэ ураты болҕомтотун киинигэр буолбута. Бу бырайыак «Земскэй луохтуур» диэн ааттанан, тустаах дьон, тэрилтэ ымпыктаан ырытыһыытын киинигэр турбута.

 

Кулун тутар 21 күнүгэр Ил Түмэн Бэрэссэдээтэлин бастакы солбуйааччы Елена Алексеева бырайыагы олоххо киллэриигэ анаммыт оробуочай бөлөх мунньаҕын тэрийэн ыытта. Мунньахха «Биир ньыгыл Арассыыйа» политическай партия Саха сиринээҕи политсэбиэтин сэкирэтээрэ, Саха сирин вице-президенэ Дмитрий Глушко, партия ситэриилээх кэмитиэтин салайааччыта Сахамин Афанасьев, Ил Түмэн доруобуйа харыстабылыгар, социальнай көмүскэлгэ, үлэҕэ уонна дьарыктаах буолууга сис кэмитиэтин бэрэссэдээтэлэ Альбина Поисеева, уо.д.а. кытыннылар.

 

Бу бырайыак олоххо киириитигэр элбэх тэрээһин үлэ ыытыллыбытын, бырайыак тыа сиригэр специалист тиийбэтин курдук улахан кыһалҕаны быһаарар соруктааҕын Дмитрий Глушко бэлиэтээн эттэ. «Идэлээх эдэр дьон үлэлэрин суолун тыа сиригэр саҕалыыллара тугунан да сыаналаммат уонна кэмнэммэт уопут буолар», — диэн эттэ уонна бырайыак бастакы кыттааччыларыгар ситиһиилэри баҕарда. «Земскэй луохтуур» бырайыак аан бастакы биэс кыттааччытыгар анаммыт 1 мөл. солк. суумалаах сертификаты Мэҥэ-Хаҥалас улууһун Майатааҕы киин балыыһа учаастактааҕы педиатр бырааһа Жанна Адамова, Уус-Алдан улууһун Бороҕоннооҕу киин балыыһа дерматолог-венеролог бырааһа Илона Аманатова, Нам оройуонун Хатырык нэһилиэгин учаастактааҕы терапевт бырааһа Зинаида Баишева, Хаҥалас оройуонун Јктөм нэһилиэгин уопсай практика бырааһа Вера Тимофеева, Чурапчы оройуонун Кытаанах нэһилиэгин учаастактааҕы терапевт бырааһа Ольга Федотова үөрүүлээх быһыыга-майгыга туттулар.

 

«Тыа сиригэр үлэлии тиийбит эдэр эмчиттэр 1 мөл. солк. үрдүнэн өссө эбии 200 тыһ. солк. бэриллиэҕэ, оттон Арктика улуустарыгар үлэлии тиийбиттэргэ итилэри таһынан аан бастаан олорор дьиэ программатын чэрчитинэн кинилэри дьиэнэн-уотунан хааччыйыыга судаарыстыба дьиэ сыанатын 50 бырыһыанын толуйуоҕун туһунан быһаарыыны үрдүкү салалта ылла», — диэн эттэ СЈ доруобуйа харыстабылын миниистирэ Александр Горохов. Кини билиҥҥи туругунан бырайыакка кыттыан баҕалаах дьонтон уопсайа 74 сайабылыанньа киирбитин, онтон докумуон сыыһа-халты толоруллубутунан, саастарынан хапсыбаттарынан, о.д.а төрүөттэргэ олоҕуран 34 специалиска маннык сертификаты бэрии аккаастаммытын, 40 сайабылыанньа бигэргэтиллибитин эттэ. «Докумуону толорууга тахсыбыт сыыһа-халты көннөрүллэн, сайабылыанньалар хаттаан көрүллүөхтэрэ, тыа сиригэр биэс сылга дуогабардаһан үлэлии тиийбиттэр бука бары судаарыстыба бу өйөбүлүгэр тиксиэхтэрэ», — диэтэ миниистир.

 

Инникитин бу бырайыакка 243 эдэр специалист хабыллыаҕын, онно федеральнай бюджеттан 243 мөл. солк. бэриллиэҕин туһунан кини эттэ. Бырайыак аан бастакы кыттыылаахтарыттан биирдэстэрэ Мэҥэ-Хаҥалас улууһун киин былыыһатын учаастактааҕы педиатр бырааһа Жанна Адамова: «Аан бастаан «Земскэй луохтуур» бырайыак туһунан кылаабынай бырааспыттан истибитим. Манна кыттарга докумуоммун хомуйан ыыппытым. Ол кэнниттэн субу бэҕэһээ ыарыһахтарбын көрө-истэ сырыттахпына, бырайыак аан бастакы кыттааччыларын ахсааныгар киирбитим туһунан иһитиннэрбиттэриттэн олус үөрдүм. Биллэн турар, судаарыстыба бу курдук улахан өйөбүлүгэр тиксибит биир идэлээхтэрим үөрүүлэрэ эмиэ муҥура суох буолуохтаах. Российскай Федерация, Саха сирин салалталарыгар, «Биир ньыгыл Арассыыйа» партия бу улахан көдьүүстээх көҕүлээһиннэрин уонна ону олоххо киллэрбиттэрин иһин улаханнык махтанабын», — диэн долгуйа-үөрэ эттэ.