Бу күннэргэ дойду киин куоратыттан Саха сиригэр төннөн кэлбит Ил Түмэн бастайааннай секретара Оксана Винокурова биһиги корреспондеммытын кытары көрүстэ уонна Москваҕа Саха Республикатын Күннэрин тэрийэн ыытыы кэмигэр СР Президенэ Егор Борисов сэтинньи 21 күнүгэр РНА Социологияҕа институтун Учуонай Сэбиэтигэр оҥорбут дакылаатын сүрүн ис хоһоонун сүнньүнэн тус бэйэтин санаатын билиһиннэрдэ.
 
– Президеммит Егор Афанасьевич Борисов РНА Социологияҕа институтун Учуонай Сэбиэтигэр оҥорбут дакылаата көннөрү бэйэ санаатын таска таһааран этинии, боростуой проблемалары ыйан-кэрдэн эрэ биэрии буолбакка, онно суһаллык быһаарары эрэйэр тирээн турар суолталаах кыһалҕалары быһаарар суолу-ииһи тобулар чопчу этиилэр баалларынан ордук кэрэхсэбиллээх дии саныыбын. Егор Афанасьевич регион салайааччытын быһыытынан национальнай сыһыаннаһыылары токурутарга холонор политологтары утары хорсун этиини оҥорбутун улаханнык сөбүлүү иһиттим. Ол аата, кини дойду сиригэр-уотугар буола турар быһыыны-майгыны туох баарынан, кырдьыгынан көрдөрдө, сахатын норуотунан, төрөөбүт-үөскээбит сиринэн-уотунан сирэйдээн Россияҕа баар национальнай республикалар билиҥҥи статустарын дириҥ ис хоһоонноох дакылаатынан көмүскээтэ.
 
Леокадия Дробижева диэн биллиилээх социолог, историческай наука доктора быйыл саас Саха сирин учуонайдарын түмэн улахан суолталаах научнай чинчийиини ыыппыта. Ол түмүгүнэн республика сиригэр-уотугар этническэй сомоҕолоһуу бигэ төрүтэ баарын быһаарбыта уонна ити дьикти көстүү саха национальнай культуратын сайыннарыыны кытары быстыспат сибээстээҕин дакаастаабыта. Итинник көрдөрүү атын ханнык да региоҥҥа суох.

 
Егор Афанасьевич национальнай республика бэйэтэ туспа государственностаах буолуохтааҕын туһунан өйдөбүл Российскай Федерация Конституциятыгар киллэриллибитин үрдүнэн, итинник ирдэбили тутуһууну сыыһа-халты өйдөөһүн, ордук чуолаан, этнократияҕа тэҥнээһин таһаарыллыа суохтааҕын ыйда, төттөрүтүн, государственнай статустаах республика бэйэни салайыныыга эппиэтинэһи үрдүктүк ылынарын, ол аата, итинник дьаһаныы олохтоох салалтаҕа уонна нэһилиэнньэҕэ улахан туһалааҕын тоһоҕолоон бэлиэтээтэ.
 
Петр Томскай, «Саха сирэ» ха´ыат