Тэрээһиҥҥэ Елизавета Ивановна төрөөбүт Курбуһаҕыттан, үлэһит буолбут Бэрт-Ууһун нэһилиэгиттэн уонна Дьокуускай куорат общественноһа кытыннылар.

 

«Елизавета Ивановна Бурцева» диэн кинигэ «Бичик» кинигэ кыһатыгар «Саха киэн туттар дьоно» серияҕа 1000 ахсаанынан бэчээттэнэн таҕыста. Кинигэни хомуйан, редакциялаан журналист, Саха АССР культуратын үтүөлээх үлэһитэ, Емельян Ярославскай аатынан уонна «Кыһыл көмүс бөрүө» бириэмийэлэр лауреаттара, Уус-Алдан, Дьааҥы улуустарын, Курбуһах нэһилиэгин Бочуоттаах олохтооҕо  Дмитрий Пухов оҥордо.

 

 

 

Кинигэ ырытыытын Уус-Алдан улууһун Киин библиотекатын отделын сэбиэдиссэйэ Галина Аммосова оҥордо. «Бу халыҥ тастаах, 152 страницалаах общественнай-политическай кинигэҕэ, улуустааҕы киин библиотекаҕа хараллан сытар, 2002 сыллаахха Елизавета Бурцева кийиитэ, Саха Республикатын Национальнай библиотекатыгар үлэлээбит Елена Бурцева бэлэмнээн таһаарбыт «Ахтан, санаан ааһыаҕыҥ» диэн хомуурунньугун матырыйааллара, хаһыаттар ыстатыйалара, Елизавета Бурцева дьиэтээҕи хаартыскалара киирбиттэр», - диэн эттэ Галина Аммосова. Кинигэ тахсыытыгар улахан көмөнү Уус-Алдан улууһун баһылыгын солбуйааччы Лена Заболоцкая, Бороҕоннооҕу улуус историятын музейа, Сыырдаах библиотеката оҥорбуттара бэлиэтэннэ.

 

 Көрсүһүүгэ бүгүҥҥү түмсүүнү тэрийсибит, үлэ, партия ветерана Зинаида Винокурова, Республиктааҕы «Племхолбоһук» генеральнай директора Степан Охлопков, Республика тыатын хаһаайыстыбатын уонна аска-үөлгэ политикатын министерствотын аатыттан Агафья Птицына, Республикатааҕы Ытык Сүбэ аатыттан Эдуард Данилов, аатырбыт ыанньыксыт, «Хотугу сулус» орден кавалера Павел Шарин, биир дойдулаахтарын ааттарыттан Курбуһах нэһилиэгин баһылыга Гаврил Бурнашев, племенной сүөһүлэри кытта үлэҕэ олоҕун анаабыт Саха АССР үтүөлээх зоотехнига, үлэ, тыыл ветерана Галина Никифорова, РСФСР үтүөлээх бырааһа, улуус Бочуоттаах олохтооҕо Иван Местников, Уус-Алданулууһун Бочуоттаах олохтооҕо, тыыл, советскай-партийнай үлэ ветерана Анна Пухова, үлэһит дьонунан аатырбыт Бэрт-Ууһун нэһилиэгин делегациятын аатыттан баһылык Юрий Колодезников, Российскай Федерация культуратын үтүөлээх үлэһитэ, Бэрт-Ууһун библиотекатын сэбиэдиссэйэ Клара Слепцова, муниципальнай сулууспа туйгуна Валерий Данилов, үлэ ветерана Зоя Ли,  төрөппүт уола Иван Бурцев тыл эттилэр.

 

Ил Тумэн Бэрэссэдээтэлин солбуйааччы, СР народнай суруйааччыта Андрей Кривошапкин Елизавета Ивановна туһунан Дмитрий Пухов суруйбут кинигэтин Саха государственнай тыатын хаһаайыстыбатын академиятын уонна техникумун студеннарыгар тарҕатыахха наада диэн этии киллэрдэ.

 

Кинигэ сүрэхтэниитигэр Ил Түмэн вице-спикерэ, Елизавета Бурцева биир дойдулааҕа Александр Жирков кыттыыны ылла. КиниУус-Алдан улууһуттан, Бэрт-Ууһуттан тахсыбыт үлэҕэ килбиэннэринэн биллибит дьону үтүө тылларынан бэлиэтээтэ. Александр Жирков Бэрт-Ууһун нэһилиэгиттэн 1937 сыллаахха ССРС Верховнай Советын депутатынан талыллыбыт, саха дьахталларыттан бастакынан Үлэ Кыһыл Знамята орденынан наҕараадаламмыт Ирина Дмитриевна Олесованы, 1947 сыллаахха Үлэ Кыһыл Знамята орденынан наҕараадаламмыт Ульяна Прокопьевна Бурцеваны, 1957 сыллаахха Ленин орденынан наҕараадаламмыт уонна Социалистичекай Үлэ Геройа буолбут Елизавета Ивановна Бурцеваны, 60-ус сыллардаахха Правительство үрдүк наҕараадаларын ылбыт Тимофей Андреевич уонна Николай Васильевич Бурцевтары ааттаталаата. «Ону таһынан, аҥардас Бэрт-Ууһуттан республика таһымыгар Ефимовтар, Даниловтар, Портнягиннар, Черкашиннар, Местниковтар, Колодезниковтар, Гоголевтар, Неустроевтар курдук биллэр-көстөр удьуор үлэһит дьон династиялара тахсыбыттара», – диэн бэлиэтээтэ Александр Николаевич.

 

«Билигин Россияҕа Үлэ Геройа ааты сөргүтэр туһунан кэпсэтии бара турар. Үлэ киһитэ хайа да кэмҥэ чиэстэниэхтээх, дьоҥҥо холобур буолуохтаах. Кыайыгас, дьулуурдаах, ситиһиилээх, үлэттэн чаҕыйбат киһи куруук инники кэккэҕэ сылдьыахтаах. Кинилэр ааттара дьоҥҥо-сэргэҕэ, ордук ычакка-оҕоҕо иһиллэ туруохтаах. Дмитрий Пухов Уус-Алдан атын да албан ааттаах дьонун-сэргэтин туһунан суруйбут кинигэлэрэ дьиҥнээх профессионал улэлэрэ буолаллар. Уус-Алдантан төрүттээх биллэр-көстөр дьоммут туһунан кинигэлэри, салгыы таһаартаран, кэнчээри ыччаттарбытыгар хаалларарга үлэни өссө салҕыы ыытыаҕыҥ», - диэн Ил Түмэн вице-спикерэ этиитин мустубут дьон ытыс тыаһынан ылыннылар.

 

Кинигэ сүрэхтэниитигэр кыттыбыт дьон кинигэ авторыгар Дмитрий Пуховка истиҥник махтаннылар, Елизавета Бурцева курдук билиҥҥи даҕаны кэмҥэ таһаарыылаахтык үлэлии-хамсыы сылдьар дьону, үлэни, үлэһит дьону үрдүктүк тутан, саха омук үлэһит үгэстэрин ыһыктыбакка илдьэ сырыттаҕына кэхтибэт оҥоһуулаах буолуохтааҕын туһунан кэпсэтэн тарҕастылар.

 

 Ил Түмэн пресс-сулууспата