Сөбүлэһии сүрүн соругунан парламеннар икки ардыларыгар бииргэ үлэлээһини төрүттүүр, кэҥэтэр, хардарыта сибээстэһиини бөҕөргөтөр туһугар күүһү  түмүү, сокуону оҥорууга  бииргэ үлэлээһин, федеральнай сокуоннар барылларын ырытан оҥоруу, Российскай Федерация Федеральнай Мунньаҕын кытары хардарыта дьайсар үлэни бииргэ сүрүннээһин буоллулар.

 

Сөбүлэһиигэ илии баттаһыы кэмигэр икки республика парламентарийдарын икки ардыгар санаа атастаһыыта буолла. Кэпсэтиигэ кыттыбыт өрүттэр парламеннар икки ардыларынааҕы үлэни эрэ буолбакка, республикалар икки ардыларыгар атын культурнай-экономическай сибээстэри эмиэ сайыннарыы туһунан биир санаалаахтарын бэлиэтээтилэр.

 

Тыва республикатын Үрдүкү Хуралын Председателэ Кан-оол Даваа Тыва парламенын аатыттан Саха сириттэн кэлбит ыалдьыттары – Ил Түмэн вице-спикерин Александр Жирковы уонна дьиэ кэргэн, оҕо, ыччат дьыалаларыгар, физическэй культураҕа уонна спортка кэмитиэтин председателэ Сергей Сюльскайы истиҥник эҕэрдэлээтэ. Кини саха парламентарийдарыгар Тыва экономикатын, культуратын, Үрдүкү Хурал үлэтин туһунан сиһилии сэһэргээтэ. Кэпсэтиигэ Үрдүкү Хурал атын депутаттара эмиэ кытыннылар.

 

Харда тылы Ил Түмэн делегациятын салайааччыта Александр Жирков эттэ: «Биһиги төрөөбүт Сахабыт сириттэн Кызыл куоракка диэри 10 часовой пояһы уҥуордаан, аҥардас салгынынан, үс авиакомпания самолеттарынан 14 чаас устата көтөн кэллибит. Дьиҥинэн манна кэлэр да, мантан Саха сиригэр тиийэр да суолу биһиги өбүгэлэрбит билэллэр этэ, уонна ол суол биһиги билигин кэлбит суолбутунааҕар быдан чугас уонна быһа этэ», – диэтэ Тыва Үрдүкү Хуралын депутаттарыгар туһаайан Саха Республикатын Ил Түмэнин вице-спикерэ.

 

Александр Жирков мустубут дьоҥҥо Саха Республикатын, дьон-сэргэ олоҕун-дьаһаҕын, республикаҕа экономика, культура, үөрэх, наука сайдыытын туһунан кэпсээтэ. 1968 сыллаахха Тува Республикатыгар Саха сириттэн партия обкомун I секретара Г.И. Чиряев салайааччылаах 100 киһилээх делегация кэлэ сылдьыбытын, Тува сиригэр Саха сирин декадата ыытыллыбытын туһунан санатан туран Александр Жирков ити 45 сыл анараа өттүгэр буолбут көрсүһүү саха дьонугар, культура, искусство үлэһиттэригэр күн бүгүҥҥэ диэри умнуллубат үтүө өйдөбүлү хаалларбытын бэлиэтээтэ. «Биһиги аҕа көлүөнэ дьоммут саҕалааһыннарын салгыах кэриҥнээхпит. Икки республика парламеннарын икки ардыларыгар бу аан бастакы сөбүлэһиини түһэрсэн, биһиги төрөөбүт норуоттарбыт үтүө дьулуурдарын толоробут»,- диэн Ил Түмэн вице-спикерэ бэйэтин харда тылын түмүктээтэ.

 

Сөбүлэһиигэ илии баттааһын сиэрин-туомун кэнниттэн Тыва Үрдүкү Хуралын Председателэ Саха сирин делегациятын чиэһигэр прием оҥордо. Прием кэмигэр Үрдүкү  Хурал аатыттан уонна Тыва Республикатын баһылыгын аатыттан Кан-оол Даваа эһиил, 2014 сылга Тыва Россия протекторатын ылыммыта 100 сыла уонна РСФСР састаабыгар киирбитэ 70 сыла туолууларыгар Саха сирин делегацията кыттарыгар ыҥырда. «Делегацияҕа Республика салалтата, үөрэх, культура үлэһиттэрэ, бизнес эйгэтин салайааччылара кэлэллэрин күүтэбит», – диэтэ Тыва Үрдүкү Хуралын Председателэ.

 

Ити күн Александр Жирков уонна Сергей Сюльскай Тыва Республикатын Тыатын хаһаайыстыбатын министрин Самойлов Монгуһу,  Үөрэх уонна наука министрин Каадыр-оол Бичелдейи, Тыва хожууннарын баһылыктарын кытта көрүстүлэр.

 

Саха парламентарийдарын Тыва Республикатын баһылыга Шолбан Кара-оол көрүстэ уонна 2014 сылга Тываҕа ыытыллар тэрээһиннэргэ Саха сирэ кыттыыны ыларыгар баҕатын биллэрдэ. Тыва баһылыга Саха Республикатын Президенигэр Е.А. Борисовка тус бэйэтин эҕэрдэтин ыытта.

 

Дьокуускайга кэлэн баран Александр Жирков Тыва Республикатын официальнай докумуоннарын Ил Түмэн Председателигэр уонна Республика Президенигэр туттарда. Саха сирин уонна Тыва Республикатын кытта доҕордуу сибээһи салгыы сайыннарарга саҥа олук уурулунна.