Саха Республикатын Ил Түмэн мунньаҕын бюджекка, үпкэ, түһээн уонна сыана бэлиитикэтигэр, бас билии уонна приватизация боппуруостарыгар сис кэмитиэтин бэрэссэдээтэлэ Александр Уаров бу сайын Сунтаарга быыбар иннинээҕи хампаанньатын ыытар кэмигэр элбэх дьону-сэргэни кытта көрүстэ, тыа сиригэр олорор быыбардааччылар кыһалҕаларын кытары билистэ. Көрсүһүүлэр түмүктэринэн уопсайа 50-тан тахса араас ис хоһоонноох суруктар, этиилэр, накаастар киирдилэр.

Киирбит суруктары ырытан көрдөххө, үгүс өттө куоракка үөрэнэр студеннар, эдэр ыччат кыһалҕаларыгар туһуламмыттар. Ол курдук, үөрэххэ киирэн баран, уопсайа суох хаалан, үөрэхтэриттэн матар кутталлаах студеннартан уонна оҕолор төрөппүттэриттэн барыта 14 сайабылыанньа киирдэ, төлөбүрдээх үөрэхтэн төлөбүрэ суохха, биир факультеттан атыҥҥа  көһүү, стипендия анааһынын туһунан боппуруостар бааллар. Аны үөрэхтэрин бүтэрэн баран үлэтэ суох сылдьар эдэр специалистар үлэ булалларыгар сүбэ-ама буоларыгар көрдөспүттэр. Александр Уаровка Сунтаар улууһуттан Санкт-Петербург куоракка үөрэнэр студеннартан тэрээһиннэри ыыталларыгар  көмө оҥороругар сурук эмиэ баар.

 

«Хас да сурук Сунтаар улууһун араас тэрилтэлэриттэн киирдэ. Холобур, Сунтаар гимназиятын капитальнай өрөмүөнэ,  спортивнай площадка тутуута, Сиэйэҕэ  балыыһа капитальнай өрөмүөнэ, Сунтаардааҕы санитарнай эпидемеологическай Киинин медицинскай оборудованиенан, оҕо садтарын саҥа оонньуурдарынан хааччыллыылара, Илимнииргэ кулууп, Кутанаҕа 80 миэстэлээх детсад тутуулара, «Кэскил» музейга инвентарь туһунан этиилэр киирдилэр», - диир норуот депутата Александр Уаров.

 

Ону таһынан олохтоохтортон тыа сиригэр олох-дьаһах таһымын уонна хаачыстыбатын үрдэтии, кырдьаҕастар «Бэс Чагда» санаторийыгар сынньанан кэлбит путевкаларын сыанатын төнүннэрии, техника, дьиэ ылалларыгар көмө көрдүүллэрин туһунан суруктар бааллар. Аны сокуон уларыйан, кыра тыаларга сабыллыбыт балыыһалары төттөрү аһарга туруорсарыгар депутакка накаас биэрдилэр.

 

«Иһэр уу хаачыстыбата мөлтөҕүн туһунан, олохтоохтору ыраас уунан хааччыйыы боппуруостара, суоллары уонна электрическай ситимнэри өрөмүөннээһин, тыа сирин олохтоохторугар саҥа олорор дьиэлэри тутуу боппуруостара олохтоохтору ордук долгутаталлар. Бу курдук киэҥ хабааннаах   боппуруостар быһаарыллан киирэн бардахтарына, Сунтаар дьоно-сэргэтэ уларыйыылар тахсыбыттарын, олохпут сайдыыта дьулурҕатык салҕанан баран иһэрин эттэринэн-хааннарынан билиэхтэрэ. Нэһилиэнньэ араас араҥатын интэриэһин көмүскүүргэ күүспүн түмэн, улууһум силигилии сайдарын, соргулаах буоларын туһугар дьулуһан туран үлэлиэм», - диэн норуот итэҕэлин ылан бэһис төгүл депутат буолбут Александр Сергеевич Уаров эрэннэрэр.