Норуот депутата Үөһээ Бүлүү бөһүөлэгэр уонна Харбалаахха сылдьан,  быыбардааччыларын кытта көрүстэ, олох-дьаһах хаамыытын билистэ, улуус мунньаҕын депутаттарын, нэһилиэк баһылыктарын кытта көрсөн элбэх этиилэрин истэн уонна суругунан ылан, хардарыта интэриэстээх кэпсэтиилэри ыытта. “Сэтинньи 26 күнүгэр буолаары турар олохтоох салайыныы баһылыктарын IV съеһигэр кинилэр этиилэрэ киирэллэрин туһугар былааннастыбыт”, -- диэтэ Марфа Филиппова.

 

Харбалаах нэһилиэгэр Исидор Барахов, Николай Золотарев  ааттарынан музейдар коллективтара, культура үлэһиттэрэ кыттыылаах улахан көрсүһүүгэ депутакка кинилэр аутсорсинг диэн программанан үлэлииллэригэр уустуктары көрсөөрү олороллорун туһунан эттилэр. Марфа Филиппова этэринэн, “Аутсорсинг дуогабарынан үлэһиттэргэ социальнай пакет көрүллэриттэн матар туруктаахпыт дииллэр. Мунаахсыйаллара элбэх эбит. Хамнас кээмэйэ кыччыах курдук көрөллөр. Тыа сиригэр аутсорсиҥҥа биэрэр тэрилтэ суоҕунан сибээстээн, кинилэр букатын да үлэтэ суох хаалар туруктаах курдук көрүнэллэр эбит. Онон бу боппуруоска эмиэ этиилэрин киллэрдилэр”.

 

Доруобуйа харыстабылыгар, федеральнай чэпчэтиилэринэн туһаныыга, тыыл ветераннарын босхо эминэн хааччыйыы ситимигэр, кыаммат араҥаҕа оҕоҕо үс сааһыгар диэри үүккэ көрүллэр үп-харчы эргиирэ бытааран, болдьохторо уһаан хаалыытыгар дьон сөптөөх дьаһаллар ылыллыахтарын баҕараллар. “Ааспыт сыл көрдөрүүтүнэн Бүлүү бөлөх улуустарыгар уопсай аукцион ыытыллан, улууска оҕо үүтэ тиксэр өлүүтэ кыччаабыт. Онон оҕолорго үүккэ бэриллэр көмө үстүү эрэ бааҥка тиксэр буолбут. Бу -- республика Правительствотын уурааҕар этиллэринэн, кыаммат араҥаҕа уонна үүтэ суох ийэлэргэ көрүллэр көмө диэн. Ол гынан баран син биир туохха да тиийбэт өлүү. Оҕо доруобуйатыгар үп-харчы хааччахтаммата буоллар диэн маны күүскэ туруорсаллар”, -- диир депутат.

 

Үөһээ Бүлүүгэ Доруобуйа харыстабылын коллективын, салалтатын кытта көрсүһүүгэ хас биирдии отдел салайааччылара норуот депутатыгар баар кыһалҕаларын кэпсээтилэр. Доруобуйа  харыстабылыгар материальнай-техническэй базаҕа, кадрынан, эминэн хааччыллыыга кыһалҕалары көрсөллөрүн, ФАП-га фельшердэр тиийбэттэрин этэллэр. Билиҥҥи үйэҕэ 150-200 нэһилиэнньэлээх ыраах сытар, кыра нэһилиэктэргэ фельдшер көрүллүбэтэ нэһилиэнньэ доруобуйатын харыстабылыгар улахан мэһэйдэри үөскэтэрин бэлиэтииллэр.  Хас биирдии учаастактааҕы балыыһаҕа терапевт врач  көрүллүөхтээх эрээри, сорох нэһилиэктэргэ тиийбэттэр. Онон кадр боппуруоһа сытыытык турар. Кылаабынай врач Светлана Сибирякова  “Тыа сирин доктора” программанан 22 эдэр специалист кэлэннэр улууска үлэлии сылдьалларын бэлиэтиир.

 

“Наукаҕа, үөрэхтээһиҥҥэ, культураҕа, сонуннары киэҥник тарҕатар средстволарга, общественноска сис кэмитиэт чилиэнэ буоларым быһыытынан доруобуйа харыстабылын, үөрэх салаатын үлэһиттэрин кытта көрсөн, киирэр сокуоннарга туох-ханнык көрүүлээхтэрин, миэстэтигэр сокуон үлэлииригэр  туох мэһэйдэр баалларын билистим.  Бэйэни салайыныы сис кэмитиэтин чилиэнин быһыытынан баһылыктары, улуус депутаттарын кытта көрсөн, олоххо-дьаһахха көдьүүстээх сокуоннар оҥоһуллалларыгар миэстэтиттэн этиилэр наадалар диэммин, ыкса сибээстээхтик үлэлиэҕиҥ диэн этии киллэрдим. Инникитин улуус салалтатын кытта уонна депутаттары кытта өйөһөммүт, бииргэ үлэлиэх буоллубут”, -- диэн кэпсээтэ Марфа Филиппова.

Норуот депутатын бу сырыытын чэрчитинэн көрбөттөр обществоларын “Үрүҥ торуоска” акциятын түмүктүүр тэрээһиннэригэр кыттан кэллэ. Киниэхэ харахтарынан инбэлииттэр дьиэ тутталларыгар, олохторун оҥостоллоругар государство өйөбүлүгэр наадыйалларын эттилэр.  Марфа Филиппова сэтинньи 16 күнүгэр улуус салалтата кыттыылаах Үөһээ Бүлүү бөһүөлэгэр депутатскай общественнай приемнайын арыйда.  Бастакы күҥҥэ норуот депутатыгар сүүрбэччэ киһи биир биир кэлэн, кыһалҕаларын быһаартарыы тула кэпсэттилэр. Депутат общественнай көмөлөһөөччүлэрэ приемнайга нэдиэлэҕэ биирдэ дьону көрсөннөр, кинилэр санааларын Марфа Филипповаҕа тиэрдиэх буоллулар. “Общественнай приемнай аһыллыыта дириҥ ис хоһоонноох. Норуоту былааска чугаһатар, кини кыһалҕаларын истээһиҥҥэ, быһаарыыга улахан наадалаах”, -- диэн депутат Үөһээ Бүлүүтээҕи рабочай сырыытын түмүктээтэ.