“Улуус киинин бары кэриэтэ олохтоохторо эбээн норуотун культуратын сайыннарыыга көдьүүстээх Бэчээт дьиэтэ утумнаах үлэ барбытын түмүгэр тутуллан аһыллыбытыттан үөрэллэр-көтөллөр. Икки сыл анараа өттүгэр тутуу былаана ылыллан, үксүн эдэр ыччат күүстээх үлэтинэн тутуллубут. “Үтүө дьыала” хамсааһынын өйөбүлүгэр эбии улуус харчы көрүнэн итиэннэ СР Бэчээккэ уонна телевидениенэн, радионан сонуннары тарҕатыыга департаменын көмөтүнэн дьоһун дьиэ үлэҕэ киирэр кыахтаммыт”, -- диэн улуустан кэлээт тута Елена Голомарева иһитиннэрдэ.

 

Эбээн-Бытантай улууһун баһылыга Иван Горохов саҥа Бэчээт дьиэтигэр Ил Түмэн хас да ыҥырыыларын народнай депутата, суруйааччы Андрей Васильевич Кривошапкин аата иҥэриллэрин туһунан бар дьонугар иһитиннэрбит. “Андрей Кривошапкин аҕыйах ахсааннаах хотугу норуоттар культураларын,  тылларын, төрүт дьарыктарын сүтэрбэттэрин, сокуонунан көмүскэллээх буолалларын туһугар олоҕун анаабыт, хотугу аҕыйах ахсааннаах норуоттар лидердэринэн буолар. Онон депутат үлэтэ сыаналанан, кини аатын иҥэрии туһунан быһаарыы ылыллыбыта дьону-сэргэни үөртэ”, -- диэтэ депутат Елена Голомарёва. Саҥа Бэчээт дьиэтэ эбээн норуотун культуратын, эбээннии кинигэлэр, эбээннэр художниктарын айымньылара, эбээннии ырыа-тойук, үҥкүү нэһилиэстибэлэрэ барыта түмүллэр дьиэтинэн буолуохтаах.

 

Соторутааҕыта улуус социальнай-экономическай программата көмүскэммит. “Нэһилиэнньэ олох-дьаһах тупсарын бэлиэтиир. Соторутааҕыта электростанцията тутуллан үлэлиир, бөһүөлэк микрооройуонугар ыаллар дьиэлэрэ ититии ситимигэр холбоммут. Онуоха олохтоохтор Правительство харчынан көмөтө көрүллэрин бэлиэтииллэр. Дьарҕаалаах нэһилиэгэр 2014 сылга хочуолунай тутуута саҕаланыахтаах, оччоҕо ыаллар дьиэлэрэ ититии киин ситимигэр холбонуохтаахтар диэн былааннарын кэпсииллэр. Улуус киинигэр таас оскуола тутулларын кэтэһэллэр. Быйыл үп-харчы кырыымчык буолан, инвестиционнай бюджекка киирбэтэ. Ол гынан баран 2015 сыл былааныгар киириэ диэн эрэнэллэр. Эбээн норуотун культуратын сайыннарар сыалтан  тэриллибит эбээлэр “Үпэндьэл» ансамблларын 10 сыллаах,  “Айанесса” оҕо үҥкүү ансамблын 20 сыллаах үбүлүөйүн үөрэн-көтөн туран бэлиэтээтилэр”, -- диэн норуот депутата хотугу дьон үөрүүтүн үллэһиннэ.