Саха Республикатын Ил Түмэнин уонна Олоҥхо Уон сылын бэлэмнээн ыытыыга Саха Республикатын национальнай тэрийэр кэмитиэтин ааттарыттан эһигини Олоҥхо күнүнэн эҕэрдэлиибин!

 

Биһиги олоҥхобут – бүтүн норуоппут киэн туттуута, өбүгэлэрбит өркөн өйдөрүн, сөҕүрүйбэт күүстээх санааларын, олоххо дьулуурдарын ким даҕаны кыайан мэлдьэспэт, намтаппат  күүстээх кэрэһитэ. Үгүс моһоллору, буомнары туораан үйэлэр улаҕаларыттан саха бүттүүн тапталынан, талаанынан бүөбэйдэнэн кэлбит хаарыан айымньыбытын харахпыт харатын курдук  харыстыыр, үүнэр ыччаппытыгар тириэрдэр биһиги, билиҥҥи көлүөнэ дьон, ытык иэспит.

 

Олоҥхону утумнаахтык, былааннаахтык үөрэтии, хомуйуу уонна харайыы П.А.Ойуунускай аатын кытта ыкса ситимнээх. Омук төрүт культурата олоччу ааспыт олох хаалынньаҥар тэҥнэнэн атарахсытыллар кэмигэр П.А.Ойуунускай  саха интеллигенциятын, удьуор олоҥхоһуттары саха олоҥхотун харыстааһыҥҥа, үөрэтиигэ түмэ тардыбыта. Биһиги кэммитигэр, олоҥхо киһи аймах уус-уран тылынан айан хаалларбыт  бастыҥ культурнай нэһилиэстибэтин ахсааныгар киириэҕиттэн, олоҥхону хомуйуу, харыстааһын уонна үөрэтии үлэтэ саҥалыы тэриллибитэ.  

 

Олоҥхо Уон сылын бэлэмнээн ыытыыга Саха Республикатын национальнай тэрийэр кэмитиэтэ Саха Республикатын Президенигэр Е.А. Борисовка 2006 сыллаахха биллэриллибит Олоҥхо Уон сылын 2015 сылтан салгыы тэрийэн ыытар туһунан этиини киллэрдэ. Маннык дьаһаныы олоҥхону салгыы харыстыыр, сайыннарар, үөрэтэр уонна аан дойду эйгэтигэр таһаарар кыаҕы улаатыннарыа, күүһүрдүө диэн эрэнэбин.

 

Билигин биһиги эпическэй нэһилиэстибэбитин  харыстыыр, үөрэтэр уонна Саха Республикатыгар, Российскай Федерацияҕа эрэ буолбакка, норуоттар икки ардыларынааҕы түһүлгэҕэ киэҥник тарҕатар үлэни  Саха сирин Культуратын уонна духуобунай сайдыытын, Үөрэхтээһинин министерстволара, республикатааҕы “Олоҥхо ассоциацията” М.К.Аммосов аатынан Хотугулуу-илиҥҥи федеральнай университет, онтон да атын тэрилтэлэр, сүүһүнэн энтузиастар иилээн-саҕалаан тэрийсэллэр. Республика улуустарыгар Олоҥхо дьиэлэрэ аһыллан үлэлииллэр, саха норуотун уонна биһиги элбэх омуктаах республикабыт бары олохтоохторун үгэстэрин, культурнай, историческай уонна духуобунай эйгэлэрин дьүөрэлэһиитин чаҕылхай холобурун көрдөрөр Олоҥхо ыһыахтара сыл ахсын ыытыллаллар.

 

Ахсынньы саҥатыгар Лондоҥҥа «Дьулуруйар Ньургун Боотур» саха эпоһа английскайдыы тылбааһын сүрэхтэниитэ буолуоҕа. Саха эпоһын «Дьулуруйар Ньургун Боотуру» кыргыз тылыгар тылбаастааһын үлэтэ бара турар, ону сэргэ М.К.Аммосов аатынан Хотугулуу-илиҥҥи федеральнай университет өйөөһүнүнэн кыргыз “Манаһын” сахалыы тылбааһа түмүктэнэн эрэр. Ити курдук, олоҥхо саха норуотун культурнай эйгэтин кэҥэтэр, аан дойду түһүлгэтигэр тахсыытын хааччыйар.

 

Кэнники сылларга республикабытыгар Олоҥхо, Хомус, Норуот маастардарын күннэрин ыытар буоллубут. Бу саха норуотун культуратын уонна үгэстэрин тута сылдьар, тарҕатар дьоммутугар ураты ытыктабылбыт уонна сүгүрүйүүбүт бэлиэтинэн буолар.

 

Эһиэхэ кытаанах доруобуйаны, этэҥҥэ буолууну уонна саха героическай эпоһын олоҥхону харыстааһыҥҥа, үөрэтиигэ уонна тарҕатыыга ситиһиилэри баҕарабын!