Депутаттар сокуон барылын боппуруостарынан арааран, түөрт хайысханан көрбүттэрэ. Бырайыагы бастакы ааҕыыта сэтинньи 7 күнүгэр ыытыллыбыта. Ол түмүгүнэн, депутаттар үгүс уларытыыны, этиини киллэрбиттэрэ. Ил Түмэн бюджекка, үпкэ-харчыга, нолуок уонна сыана политикатыгар, бас билиигэ уонна привати-зациялааһыҥҥа бастайааннай комитетын председателэ Юрий Николаев этэринэн, сокуон бырайыагар барыта 184 этии киирбит. Правительство бу түмүгүнэн 58 көннөрүүлэри киллэрбит.

Маны таһынан сокуон бырайыагын көрүүгэ счетнай палата, юстиция, прокуратура көннөрүүлэрин эбии киллэрбиттэрэ. Холобур, прокуратура бюджет сокуонун бырайыагар тулаайах оҕолору дьиэлээһин боппуруоһугар быраабы кэһии баарын ыйбыта. Сокуон бырайыагынан, эһиилги бюджекка бу боппуруоска 162,3 мөл. солк. көрүллэ сылдьар. Ити сууматтан 100 мөл. солк. республикаттан, оттон 62,3 мөл. солк. федеральнай үбүлээһинтэн кэлиэхтээх. Юрий Николаев прокуратура этиитигэр: «Муниципальнай тэриллиилэр билигин бу оҕолорго тутуу ырыынагыттан бэлэм дьиэни биэрэр кыахтара суох буолан, саҥа дьиэни тутуохтарын наада. Оттон саҥа дьиэни тутуу биир сылынан хайдах да быһаарыллыбат. Ол иһин быйыл көрүллүбүт 360 мөл. солк. кыайан туһаныллыбата, онон бу харчы эһиилги үбүлээһиҥҥэ көһөн биэриэҕэ. Ону таһынан үп министерствота сыл устата бу боппуруоска үбүлээһин хайдах баран иһэриттэн көрөн, харчыны аныахтаах», — диэн хоруйдуур.

 

Сокуон иккис ааҕыыга бүтэһиктээхтик ылынылынна эрээри, сорох депутаттар санаалара сиппэккэ тарҕастылар. Холобур, депутат Петр Аммосов үүт туттарыытыгар субсидияны элбэтэр туһунан этиитэ сокуоҥҥа киирбэтэх. Кини билигин 17,5 солк. үүккэ бэриллэр субсидияны улаатыннаран, 32 солк. таһаарарга этэр. Оччотугар сылга государство хааһынатыттан 2014 с. былааннаныллыбыт 80 тыһ. тонна үүккэ 1 млрд 160 мөл. солк. барыахтаах. Манна даҕатан эттэххэ, тыа хаһаайыстыбатыгар уонна аграрнай политикаҕа комитет мунньаҕар бу боппуруос турбута эрээри, депутаттар үгүстэрэ утары куоластаабыттара. Комитет председателэ этэринэн, бу боппуруос сокуон бырайыагар «тыа хаһаайыстыбата оҥорон таһаарар бородууксуйатын өйөөһүн бюджет хайдах толоруллан иһэриттэн көрөн барыаҕа» диэн сурулла сылдьар. Онон үүккэ бэриллэр субсидия оннунан хаалла.

 

Правительство барыллааһынынан, эһиилги бюджет дохуота – 133,7, ороскуота – 144,1, дефицитэ – 10,3 млрд солк. тэҥнэһиэхтээҕэ. Ол эрээри Россия хааһынатыттан кэлэр харчы 209,1 мөл. солк. кыччаабытынан, маннык буолан таҕыста: дохуота – 133,5, ороскуота – 143,9, оттон дефицитэ – 10,3 млрд солкуобай.