Саха Өрөспүүбүлүкэтин Судаарыстыбаннай Мунньаҕын (Ил Түмэнин) аатыттан Российскай Федерация Конституциятын күнүнэн эҕэрдэлиибин!

 

Ахсынньы 12 күнэ – Российскай Федерация уонна кини субъектарын историяларыгар ураты күн. 20 сыл анараа өттүгэр, 1993 сыллаахха норуот бүттүүнүн куоластааһынан Российскай Федерация саҥа гражданскай обществоны тутар анал туругун быһаарбыт дойду саҥа Конституцията ылыллыбыта. Бу бэлиэ күнтэн саҕалаан Российскай Федерация  судаарыстыбаннаһын сайдыытын саҥа кэрдиис кэмэ ааҕыллар. Төрүт Сокуон Российскай Федерация судаарыстыбаннаһын, Федерация  бары норуоттара ахсааннарыттан тутулуга суох көҥүллүк сайдыыга дьулуһууларын араҥаччылыыр, дойду национальнай интэриэһин көмүскээһиҥҥэ сомоҕолуур, судаарыстыба олоҕо-дьаһаҕа чөл уонна кэскиллээх буолуутун хааччыйар соруктаах.

 

Бүгүҥҥү күҥҥэ Российскай Федерация Төрүт Сокуона мэктиэлииринэн Саха Өрөспүүбүлүкэтэ судаарыстыба статустаах, Конституциялаах. Саха Өрөспүүбүлүкэтин Ил Түмэнин иннигэр Российскай Федерация Конституциятыгар сөп түбэһэн бэйэбит өрөспүүбүлүкэбит Конституциятын салгыы бөҕөргөтөр, араҥаччылыыр, өрөспүүбүлүкэ сокуону оҥорор кыаҕын тупсарар, кэҥэтэр уустук сорук турар. Сүрүн сокуоннар төрөөбүт дойдубут модун күүстээх, бэйэтин олохтоох норуоттарын интэриэстэрин көмүскүүр, дьон-сэргэ төрүүр-ууһуур, үөрэнэр, үлэлиир, айар-тутар, чөл туруктаах буолар быраабын араҥаччылыыр үтүө дьайыылаахтар. 

 

Эһиэхэ чэгиэн доруобуйаны, уһун үйэни, Россия судаарыстыбата уонна төрөөбүт Сахабыт сирэ сайдалларын туһугар айымньылаах үлэни, дьоһун олоҕу баҕарабын!