Эрдэ иһитиннэриллибитин курдук, олунньу 4 күнүгэр ыытыллыбыт Ил Түмэн V пленарнай мунньаҕа “2013 сыллааҕы навигация кэмигэр Индигиир бөлөх улуустарыгар олоҕу-дьаһаҕы хааччыйар тыын суолталаах таһаҕаһы тиэйиигэ-таһыыга үөскээбит быһыыны-майгыны дьокутааттар сыныйан көрүүлэрин туһунан” уурааҕы ылыммыта.
 
Санатан эттэххэ, тахсыбыт быһыыны-майгыны дьокутааттар ирдэһиилэрэ Ил Түмэн хонтуруоллуур үлэтин биир көрүҥүнэн буолар уонна бу общественнай суолталаах, бөрүкүтэ суох, быһыы-майгы тахсыбыт төрүөттэрин туһунан нэһилиэнньэҕэ иһитиннэрэр, ол содулларын туоратар сүбэлэри ылынар туһугар ыытыллаллар. Норуот депутаттара Индигиир бөлөх улуустарыгар таһаҕаһы тиэйии-таһыы тохтуутун төрүөттэрин, таһаҕаһы таһыыга боломуочуйалаах уорганнар уонна тэрилтэлэр үлэлэрин сыныйан ырыттылар, ити үлэҕэ специалистар уонна экспертиир тэрилтэлэр кытыннылар.  
 
Хонтуруоллуур уонна экспертиир киэҥ хабааннаах үлэлэр ыытыллыбыттарынтүмүгэр депутаттар хамыыһыйалара Индигиир бөлөх улуустарыгар таһаҕаһы тиэйии-таһыы тохтуутун биир сүрүн төрүөтүнэн «Өлүөнэ бассейныгар ис уу суолларын дьаһалтата» ФБУ мөлтөх үлэтэ буоларын ыйбыта. Манан сибээстээн, Ил Түмэн Муора уонна өрүс тырааныспарын Федеральнай агентствотыгар туһаайан «Өлүөнэ бассейныгар ис уу суолларын дьаһалтата» ФБУ үлэтин-хамнаһын бэрэбиэркэлииригэр итиэннэ бу тэрилтэ салайааччыта толорор солотугар сөп түбэһиитин туһунан боппуруоһу көрөрүгэр, таһаҕаһы таһыыга ыытар үлэтигэр дьайыылаах хонтуруолу тэрийэригэр этэр уурааҕы ылыммыта.
 
Кадр боппуруоһугар республика парламена туруорар кытаанах ирдэбилин сэргэ 2014 сылга уу суолунан таһаҕаһы таһыыга эрдэттэн бэлэмнэниини хааччыйыыны, ол иһигэр,  Индигиир өрүс чаарыгар суудуна сылдьар ханаалын оҥорууну хабар Ил Түмэн Председателэ Александр Жирков илии баттааһыннаах парламент уурааҕа Российскай Федерация транспорга министрэ Михаил Соколов, Муора уонна өрүс тырааныспарын Федеральнай агентствотын салайааччыта Александр Давыденко ааттарыгар ыытылынна.
 
Справка:
 
Снытко Павел Владимирович -- «Өлүөнэ бассейныгар ис уу суолларын дьаһалтата» ФБУ салайааччыта. 1984 сыллаахха Новороссийскайдааҕы үрдүкү инженернэй муора училищетын бүтэрбитэ. Новороссийскайга муора пароходствотын танкернай флотугар, кыраныысса таһыгар устар суудуналарга үлэлээбитэ. Новороссийскай пордугар муора дьаһалтатыгар үлэлээбитэ, муора салаатын предприятиеларын салайбыта. 
 
Ил Түмэн пресс-сулууспата