Александр Жирков бу боппуруоска ааспыт сыл ахсынньы 26 күнүгэр ыыппыт мунньаҕын уураахтарын толоруу хаамыытын хонтуруоллуур мунньаҕар  Александра Овчинникова 100 сааһыгар аналлаах тэрээһиннэри бэлэмнээһин хаамыытын уонна тэрийэн ыытыы былаанын туһунан иһитиннэриини Ил Түмэн аппараатын салайааччыта Юрий Кравцов оҥордо. Кини этэринэн, тэрээһиннэри бэлэмнээһин былааныгар кэккэ саҥа боппуруостары киллэрэр эрэйиллэр. Ол курдук Ньурба улууһугар А.Я.Овчинникова бюһун уонна скверин оҥорууга эбии 1610 мөлүйүөн солбкуобайдаах үбүлээһини туруорсуу баар. Ю.Кравцов Правительство Председателигэр Галина Данчиковаҕа үбүлээһини көрөр туһунан суругу өссө биирдэ ыытар наадатын бэлиэтээтэ. А.Я.Овчинникова дьиэ кэргэнигэр 50 тыһыынча солкуобайдаах көмө, “Республика уһулуччулаах дьоно” сериянан кини туһунан кинигэ тахсыытыгар 150 тыһыынча солкуобай көрүллүбүттэр. Мунньахха улуус дьаһалтата үбүлээһиҥҥэ урут бигэргэттэрбит, сөбүлэһиллибит сыыппараттан атын, эбии үбүлээһини туруорсара табыгаһа суоҕун, ону бэйэтин бюджетын иһинэн көрүнүөн сөбүн туһунан этилиннэ.

 

Киин куорат дьаһалтатын бэрэстэбиитэлэ Георгий Иванов иһитиннэрбитинэн, А.Я.Овчинникова бюһа туруохтаах сирин учаастага быһаарылла илик. Арай ону Албан аат аллеята диэн саҥа тутуллуохтаах аллеяҕа аны икки сылынан туруорар кыаллыан сөп курдук диэн этиини кытта Ньурба улууһуттан талыллыбыт норуот депутата Владимир Прокопьев сөбүлэспэтин биллэрдэ. Ити боппуруоска урут түһэрсиллибит Сөбүлэһиигэ оччолорго Ил Түмэн Председателэ В.Н.Басыгысов уонна мэр Айсен Николаев илии баттаабыттарынан 2014 сылга оҥоһуллуохтааҕа ыйылла сылдьар. Итинэн сибээстээн Ил Түмэн билиҥҥи спикерэ Александр Жирков ити Сөбүлэһии докумуонугар ханнык болдьох турарынан хонтуруолга ылар наадатын эттэ. Спикер бюст туруохтаах миэстэтин баран көрөрү итиэннэ ону уһаппакка быһаарары наадалааҕынан аахта.

 

 СР Бэчээт дьыалатыгар, телевидениенэн уонна радионан сонуннары тарҕатыыга департаменын салайааччытын бастакы солбуйааччы Николай Молчанов Александра Овчинникова олоҕор, үлэтигэр анаммыт биэриилэри, республика уонна улуус хаһыаттарыгар суруйуулары  бэлэмнээһин былаанын билиһиннэрдэ. Кини иһитиннэрбитинэн, А.Овчинникова туһунан киинэ уһуллан бэлэм, парламеҥҥа ону көрөн баран, бүтэһиктээхтик бигэргэтэр наада. Республикаҕа телевидениенэн, радионан, хаһыаттарынан, сурунааларына, “Сахамедиа” Интернет-порталынан А.Я.Овчинниковаҕа аналлаах биэриилэр, суруйуулар тахсаллара былааннанар. Кинигэни таһаарыы үбүлээһинэ көрүллүбүт.

 

Республика транспорга уонна суол хаһаайыстыбатыгар министрэ Семен Винокуров Суол хаһаайыстыбатын музейын тэрийии, ону алтынньыга Суол үлэһиттэрин күнүгэр арыйыы болдьоҕун уонна музейга Александра Овчинникова аатын иҥэрии боппуруоһугар үлэ бара турарын туһунан кэпсээтэ.

 

Ньурба улууһун баһылыгын солбуйааччы Юрий Николаев биир дойдулаахтара Александра Овчинникова төрөөбүтэ 100 сылын бэлиэтээһиҥҥэ туох былааннардаахтарын туһунан иһитиннэрдэ. Ол курдук А.Я.Овчинниковаҕа аналлаах уруоктар, музейнай күннэр, экспозициялар быыстапкалара тэриллиэхтээхтэр. Антоновка сэлиэнньэтигэр саҥа таас кулуубу тутуу, онно бу биллэр-көстөр киэн туттар киһилэрин аатын иҥэрии, Александра Яковлевна бюһун уонна скверин оҥоруу, Чаппанда нэһилиэгэр “Сааскылаана” оҕо саадын өрөмүөнүн ыытыы курдук үлэлэр бараллара былааннанар. Антонина Григорьева итиннэ эбии Антоновка уонна Чаппанда нэһилиэктэриттэн олохтоохтор киин куоракка кэлиилэригэр транспорт боппуруоһун туруорсуу баарын санатта. 

 

Оттон ХИФУ педагогическай үөрэхтээһиҥҥэ проректора Михаил Федоров университекка научнай-практическай конференцияны тэрийэн ыытыыга 400 тыһыынча солкуобай көрүллүбүтүн уонна бастыҥ студеннарга А.Я.Овчинникова аатынан 10 тыһыынча солкуобайдаах биир кэмнээх стипендияны олохтуур туһунан быһаарыы ылыллыбытын иһитиннэрдэ.

Республика кырдьаҕастарын Ытык Сүбэтин председателэ Люлия Григорьева Александра Овчинникова аатын үйэтитэр кинигэҕэ урукку ахтыыларга эбии саҥаны  хомуйан бэчээккэ бэлэмнээбиттэрин, онон аны күһүн суол сабылла илигинэ кинигэ бэчээттэнэн тахсыахтааҕын туһунан санаатын үллэһиннэ. Кинигэни журналист Иван Борисов уонна Эдуард Данилов хомуйан бэлэмнээбиттэр.

 

Ил Түмэн наукаҕа, үөрэхтээһиҥҥэ, культураҕа, сонуннары киэҥник тарҕатар средстволарга уонна общественнай тэрилтэлэр дьыалаларыгар сис кэмитиэт председателэ Антонина Григорьева парламент А.Я.Овчинникова төрөөбүтэ 100 сааһын бэлиэтиир тэрээһиннэрин былаанын иһитиннэрдэ.

 

Александр Жирков А.Я.Овчинникова 100 сааһа аныгы стилинэн 2015 сыл тохсунньу 7 күнүгэр туолуохтааҕын бэлиэтээтэ. Онон республика биллэр-көстөр государственнай, общественнай деятелин дьиҥнээх төрөөбүт күнэ туолбутун кэннэ кини төрөөбүтэ 100 сылын ыытар сиэрдээх буолуоҕун туһунан этэн туран, спикер бары тэрээһиннэри 2015 сыл тохсунньутугар эбэтэр тохсунньуга ыытары сиэр-туом көҥүллээбэтинэн, олунньуга көһөрөргө этии киллэрдэ. А.Я.Овчинникова бюһун туруоруу, сквери аһыы уонна Ил Түмэн үөрүүлээх мунньаҕын ыытыы ити сыл тохсунньу-олунньу ыйдарыгар оҥоһуллара ордугун бэлиэтээбитин мунньах кыттыылаахтара өйөөтүлэр.