Спикер бу сыл тохсунньу 31 күнүгэр ыыппыт тэрийэр кэмитиэт мунньаҕын уураахтарын толорууну хонтуруоллаата. Ол чэрчитинэн Ил Түмэн аппараатын салайааччыта Юрий Кравцов үбүлүөй тэрээһинин былаана  төһө туолан иһэрин билиһиннэрдэ. Үбүлүөйү тэрийэн ыытыы былаана республика уонна улуус таһымнарыгар араарыллан оҥоһуллубут. “Республика Бочуоттаах дьоно” сериянан “Горохова Евдокия Николаевна” кинигэни бэчээккэ таһаарыы быйылгы былааҥҥа киирбит, үбэ көрүллүбүт. Сонуннары киэҥник тарҕатар средстволарга Евдокия Горохова туһунан ыстатыйалары сыл иккис аҥарыттан бэлэмнээн таһаарыы, үөрүүлээх мунньаҕы ахсынньыга Ил Түмэн мунньахтыыр саалатыгар ыытыы былааннанар. Билиҥҥи кэмҥэ Е.Н.Горохова тус көрдөһүүтүнэн кини дьиэ кэргэнигэр көмө боппуруостара быһаарылла сылдьар.

 

Аллайыаха улууһугар Чкалово нэһилиэгэр Культурнай спортивнай комплексы тутуу туһунан этэригэр “Сахам сирэ ХХI үйэҕэ” үтүө дьыала республикатааҕы хамсааһын салайааччыта Иван Емельянов түргэнник тутуллар аныгы матырыйаалларынан тутар ордугун ыйда. Кини этэринэн, “Интехстрой” САО тутууну ыытарыгар улууска тутааччы идэлээх суоҕа атахтыан сөбө бэлиэтэннэ. Матырыйаалын тиэртэххэ, 2014 сылтан саҕалаан баран, 2015 сылга тутан бүтэрэр кыаллыан сөп диир Иван Емельянов. Онон тутуллан бүттэҕинэ, бу КСК Е.Н.Горохова аатын сүгүөхтээҕэ сабаҕаланар.

 

Спикер этэринэн, КСК-ны наадалаах спортивнай тэрилинэн, аудио техниканан толору хааччыйар сорук турар. Онон Александр Жирков бу тутууну бары өттүнэн хааччыйыыны республикатааҕы таһымнаах дьаһалларга киллэрэр сөбүн ыйда.  Оччоҕуна Культура уонна духуобунай сайдыы  итиэннэ Спорт министерстволара КСК-ны толору комплегынан хааччыйыыга үлэни ыытыахтара.

 

Е.Н.Горохова туһунан документальнай киинэни оҥоруу Аллайыаха улууһун былааныгар киирэн сылдьар.

 

Депутат Владимир Членов Чкалово нэһилиэгин олохтоохторун  туруорсууларын иһитиннэрдэ. Ол курдук нэһилиэккэ үлэ баар буоларын туһугар Чкаловка Айылҕа харыстабылын министерствотын өттүттэн 25 төбө овцебыктары, Тыа хаһаайыстыбатын уонна ас-үөл политикатын министерствотын көмөтүнэн ынах сүөһүнү илдьэри, килиэп бэкээринэтин тутары, тракторынан хааччыйары, хочуолунайдара кутталлаах балаһыанньалааҕынан болҕомтоҕо ылары дьон туруорсар. Нэһилиэккэ радио да, сибээс да суох. Спикер депутат сорох этиилэрин бэлиэҕэ ыларга эттэ.

 

Тэрийэр кэмитиэт председателэ, Ил Түмэн спикерэ Александр Жирков Евдокия Николаевна Горохова тус көрдөһүүтүн толорор эрэйиллэрин бэлиэтээн эттэ итиэннэ ыытыллыахтаах тутуу бырайыагын, үбүлээһинин быһаарар уонна үбүлүөйү тэрийэн ыытыы былаанын бигэргэтэр уурааҕы ылыныынан кэмитиэт мунньаҕын түмүктээтэ.