Норуот депутата бу сырыытыгар Ил Түмэн олохтоох салайыныы бэрэстэбиитэллээх уорганнарын кытта түһэрсибит Сөбүлэҥин быһыытынан олохтоох депутаттарга сүбэлиир, иһитиннэрэр-сырдатар үлэни ыытта. Ил Түмэҥҥэ республика дьонун-сэргэтин интэриэстэрин көмүскүүр ханнык сокуоннары ылыныыга туох үлэлэр бара туралларын билиһиннэрэн туран, нэһилиэктэр дьаһалталарын бэрэстэбиитэллээх уорганнарын депутаттарын кытта тыа нэһилиэнньэтигэр наадалаах  сокуон барылын оҥорууга көҕүлээһиннэри киллэриигэ кинилэр көхтөөхтүк кытталлара эрэйиллэрин тула кэпсэтэн, сүбэ-соргу тутта.

 

Марфа Филиппова, бастатан туран, Горнай улууһугар Маҕарастан саҕалаан Бэс Күөлүгэр, Кэптиҥҥэ, Күөрэлээххэ, Бэрдьигэстээххэ, Орто Суртка, Ааһымаҕа уо.д.а. барыта 9 нэһилиэккэ сырытта.

 

Депутаты кытта көрсүһүүлэр кэмнэригэр нэһилиэктэр олохтоохторо тыа хаһаайыстыбатын туһунан республика сокуонун барылыгар фермердэри, кэтэх хаһаайыстыбалары өйөөһүнү, тыа хаһаайыстыбатын тэрилтэлэригэр уокка, нолуокка чэпчэтиилэри көрүүнү, үүт сыанатын үрдэтиини көрөрү, биэскэ диэри ынахтаах хаһаайыстыбаларга субсидия харчыта көрүллүүтүн, улууһу гаастааһыны, иһэр уунан хааччыйыыны, ракета тобохторун быраҕыыны киһи олорор сиригэр бобор  тустарынан этэллэр. Сүөһү ахсаана аҕыйыы турарынан сибээстээн, кинилэр биирдиилээн хаһаайыстыбаларга сүөһүтүн ахсааныттан тутулуга суох государствоттан өйөбүл баар буолуоҕар баҕаларын биллэрэллэр.

 

“Горнай  улууһун олохтоохторо сирдэрэ кыратынан, оттуур сир мөлтөҕүнэн сүөһү иитэллэригэр улахан мэһэйи көрсөллөр, илиинэн оттоон олороллор. Эт регламеныгар киириигэ эти туттарыыга кыайан үлэлээбэт туруктаахтарын этинэллэр. Ол курдук кинилэртэн ыраах, Үөһээ Бүлүүгэ Нам уонна Хоро нэһилиэктэригэр, буойунаны тутар былаан баара кинилэргэ соччо табыгаһа суоҕун ыйаллар.

Муниципалитеттар наһаа элбэх бэрэбиэркэ кинилэр үлэлэрин атахтыырын туһунан кэпсииллэр. Холобура, эдэр ыалларга уһаайба сирэ биэриитигэр мас кэрдээри гыннахтарына, баһаарынайдар эбэтэр ойуур хаһаайыстыбатын үлэһиттэрэ уо.д.а. ыстарааптыыр суруктаах тиийэн кэлэллэрэ баар суол. Онон дьаһалталар бэйэлэрин боломуочуйаларын кыайан толорбот турукка киирэллэрин сокуон өттүнэн чуолкайдааҥ диэн туруорсаллар”, -- диир депутат.

 

Оттон Үөһээ Бүлүүгэ Маҥаас, Далыр, Өргүөт, Быракаан, Балаҕаннаах, Ороһу, Тамалакаан, Харбалаах нэһилиэктэригэр көрсүһүүлэргэ дьон тыа сирин сайыннарыы, сүөһү, сылгы иитиитин государство өттүттэн өйөөһүн боппуруостарын туруорсубуттар. Холобура, Маҥаас нэһилиэгэр сааскыттан саҕалаан кыһыҥҥы суол туруор диэри сиринэн суолара быстарынан олохтоохтор республикаттан вездеходу туруорсалларын туһунан норуот депутатыгар санааларын тиэрдибиттэр. Бу нэһилиэккэ киин хочуолунайга аҕыйах ыал эрэ холбонон олорор. Тэйиччи олорор ыалларын холбуурга 9,5 мөл эрэйиллэр эбит. Уҥуоргу газ тиийбэт нэһилиэктэригэр уотунан ититинэр ыалларга чэпчэтии көрүллэр. Онон итинник чэпчэтии кэлэрэ буоллар, уотунан ититиигэ көһүө этибит дииллэр олохтоохтор.

 

 

--Быракаан уонна Өргүөт олохтоохторо нэһилиэнньэ доруобуйатын кэлэн көрүү сэдэхсийбитин бэлиэтииллэр. Кэмигэр медицинскэй көрүү оҥоһуллубатаҕын түмүгэр Өргүөттэн хас да оҕо сэллик балыыһатыгар эмтэнэллэр. Тыа хаһаайыстыбатын туһунан сүрүн сокуон барылыгар ыраах, кырыы нэһилиэктэр суолларын, уратыларын учуоттуур балаһыанньалары киллэрэри, республика телевидениетэ улуус элбэх нэһилиэктэригэр көстүбэтин этэллэр. Оттон үөрэх эйгэтин үлэһиттэрэ “Үөрэхтээһин туһунан” сокуоҥҥа Үөһээ Бүлүүгэ уонна Бэрдьигэстээххэ үлэлиир гимназиялар статустарын көрөргө, кыһыҥҥы бириэмэттэн сайыҥҥы кэмҥэ  көһүү сокуоҥҥа киирэрин  этэллэр, -- диэн кэпсиир Марфа Филиппова. 

 

Үөһээ Бүлүүгэ 2017 сылга Манчаары оонньуута буоларыгар трассага олорор нэһилиэктэр бэлэмнэнэн эрэллэр эбит. Ол курдук  кинилэр суолларын-иистэрин, нэһилиэктэр тас көстүүлэрин тупсарыыга кыһанан, үлэ ыыта сылдьаллар.

 

Норуот депутата Республика күнэ кэлэн иһэринэн сибээстээн, оскуола оҕолоругар “Государственность уруоктарын” ыытан, Саха сирин нэһилиэнньэтин олоҕун-дьаһаҕын сокуон өттүнэн хааччыйыыга, республика  государственноһын сайыннарыыга Ил Түмэн ыытар үлэтин, республика государственноһын төрүттээбит норуот бастыҥ дьонун тустарынан билиһиннэрдэ. “Саха норуотун чулуу уолаттарыттан биирдэстэрэ, биир дойдулаахпыт Исидор Барахов пааматынньыга Дьокуускайга  аһыллыытыгар улуустан кэлээри бэлэмнэнэ сылдьаллар”, -- диир кини.

 

Депутат бу сырыытыгар аҕам саастаах быыбардааччылара “сэрии оҕолоро” диэн  статуһу туруорсубуттар. Горнайга депутаттар улуус мунньаҕынан көрөннөр, итинник статуһу көрөргө этии көтөхпүттэр.

 

Онон Марфа Филиппова нэһилиэктэргэ ый аайы сылдьан, дьону кытта көрсөн кэпсэтэн, кинилэртэн элбэх саҥа этиилэрдээх, санаалардаах кэлэрин икки улуус олохтоохторо биһирииллэр, Ил Түмэн депутаттара бэйэлэринэн кэлэн, атах тэпсэн олорон кинилэр тустарыгар сокуон өттүнэн туох дьаһаллар ылыллан эрэллэрин билиһиннэрэллэрэ үчүгэй үгэс буоларыгар баҕараллар.