Ил Түмэн Председателэ Александр Жирков муус устар 25 күнүгэр Санкт-Петербурга Таврическай дыбарыаска ыытыллаары турар Российскай Федерация сокуону оҥорооччуларын Сэбиэтин мунньаҕар тыл этэн кыттыаҕа.
 
Мунньаҕы Федеральнай Мунньахха Федерация Сэбиэтин Председателэ Валентина Матвиенко уонна Государственнай Дума Председателэ Сергей Нарышкин салайан ыытыахтара.
 
Мунньах кыттыылаахтара бюджеттар икки ардыларынааҕы сыһыаннаһыылар проблемаларын, Россия Президенэ Федеральнай Мунньахха Анал этиитин уонна оҕолор тустарыгар ыытыллар үлэлэр Национальнай стратегияларын олоххо киллэрии хаамыытын дьүүллэһиэхтэрэ. Государственнай Дума Председателэ Сергей Нарышкин, РФ Правительствотын Председателин солбуйааччы Ольга Голодец, РФ үбүн министрэ Антон Силуанов, РФ региональнай сайдыыга министрэ Игорь Слюняев, Россия Ааҕар-суоттуур палататын председателэ Татьяна Голикова, Крым Республикатын Государственнай Сэбиэтин председателэ Владимир Константинов уонна да атыттар дакылааттара истиллиэҕэ.
 
Ил Түмэн спикерэ Александр Жирков Российскай Федерация Президенэ 2013 сыллаахха ахсынньы 12 күнүгэр Федеральнай Мунньахха Анал этиитин государственнай былаас сокуону оҥорор (бэрэстэбиитэллээх) уорганнара олоххо киллэриилэрин дьүүллэһиигэ тыл этиэҕэ.
 
Сокуону оҥорооччулар Крым Республиката уонна Севастополь Российскай Федерация правовой, политическай, экономичсекай, социальнай уонна финансовай тиһиктэригэр алтыһан киирэр дьаһалларын сокуон өттүнэн көрүүнү дьүүллэһиэхтэрэ. Бюджеттар икки ардыларынааҕы сыһыаннаһыылар көдьүүстэрин үрдэтии көрүллүөҕэ. Парламентарийдар РФ субъектарын уонна муниципальнай тэриллиилэр бюджеттара уһун болдьоххо биир тэҥ уонна бигэ буолар суолларын дьүүллэһиэхтэрэ. Ити дьүүллэһии чэрчитинэн “Региональнай уонна муниципальнай үбү-харчыны көдьүүстээхтик уонна эппиэтинэстээхтик салайыы, РФ субъектарын бюджеттарын бигэ туруктаах буолууларын үрдэтии усулуобуйаларын тэрийии” Российскай Федерация государственнай тосхолун олоххо киллэрии туһунан дакылааттары истиэхтэрэ.
Сокуону оҥорооччулар 2012 – 2017 сылларга оҕолор тустарыгар ыытыллар үлэлэр Национальнай стратегияларын олоххо киллэрии хаамыытын көрүөхтэрэ. Регионнар тулаайах уонна төрөппүт көрүүтэ-истиитэ суох хаалбыт оҕолору олорор дьиэнэн-уотунан хааччыйыыга, социальнай тулаайахтарга эрдэттэн сэрэтэр үлэни ыытыыга уонна тулаайах оҕолору олохтооһун араас көрүҥнэригэр, оҕолорго информационнай өттүнэн куттал суоһаабатын хааччыйыыга баар уопуттарын атастаһыахтара.
Итини таһынан, Российскай Федерация сокуону оҥорооччуларын Сэбиэтин мунньаҕар 2014 сылга Россия сокуону оҥоруутун туругун туһунан отчуоту бэлэмниир үлэ кээмэйдэрин уонна хаамыытын дьүүллэһиэхтэрэ.
 
ЫСПЫРААПКА
 
Российскай Федерация Федеральнай Мунньаҕар Российскай Федерация сокуону оҥорооччуларын Сэбиэтэ – Российскай Федерация дьаһайыытыгар баар боломуочуйалары тыырыы эйгэтигэр государственнай политиканы олоххо киллэриини сокуон өттүнэн хааччыйыыга уонна Российскай Федерация уонна Российскай Федерация субъектара кыттыгас дьаһайыыларыгар, Российскай Федерация Федеральнай Мунньаҕар Федерация Сэбиэтин, Государственнай Думатын уонна Российскай Федерация субъектарын государственнай былаастарын сокуону оҥорор (бэрэстэбиитэллээх) уорганнарын хонтуруоллуур боломуочуйаларын олоххо киллэрии механизмнарын тупсарыыга, кинилэр сокуону оҥорор үлэҕэ хардарыта бииргэ үлэлээһиннэрин уонна парламентскай үлэҕэ уопуттарын атастаhыыларын тэрийиигэ анаан 2012 сыллаахха ыам ыйыгар тэриллибит Российскай Федерация палаталарыгар сүбэлэһэр уонна сүбэлиир уорган.
Российскай Федерация сокуону оҥорооччуларын Сэбиэтин састаабыгар Российскай Федерация Федеральнай Мунньаҕар Федерация Сэбиэтин Председателэ, Государственнай Дума Председателэ, кинилэр бастакы солбуйааччылара (солбуйааччылара), Российскай Федерация субъектарын государственнай былаастарын сокуону оҥорор (бэрэстэбиитэллээх) уорганнарын председателлэрэ уонна Федерация Сэбиэтин итиэннэ Государственнай Дума кэмитиэттэрин председателлэрэ киирэллэр.
 
Ил Түмэн пресс-сулууспата