Сис кэмитиэт чилиэннэрэ республика 2014 сыллааҕы бюджетыгар уларытыылары киллэрэр туһунан республика сокуонун барылыгар үп министрэ Валерий Жондоров итиэннэ 2013 сылга республика Ааҕар-суоттуур палатата бюджет үбүн хонтуруоллааһыҥҥа ыыппыт үлэтин түмүктэригэр палата аудитора Владимир Птицын дакылааттарын иһиттилэр.

Бастакы дакылаатынан депутаттар республика государственнай бюджетын туһунан сокуоҥҥа киирбит уларытыылары ырытан, дьүүллэһэн баран, Ил Түмэн ылыныытыгар быһааран,  салгыы парламент бюджекка, үпкэ, нолуокка уонна сыана политикатыгар, бас билиигэ уонна приватизацияҕа сис кэмитиэтин көрүүтүгэр ыыттылар.

 

Аудитор Владимир Птицын олохтоох салайыныы боппуруостарыгар сыһыаннаах хайысханан Ааҕар-суоттуур палата ыыппыт хонтуруоллуур үлэлэрин түмүктэрин иһитиннэрдэ. Ол курдук төгүрүк тулаайах оҕолору олорор дьиэнэн-уотунан хааччыйыыны, суол тутуутугар фонда, киин куорат дьаһалтатын иһинэн үлэлиир муниципальнай унитарнай тэрилтэлэр уо.д.а. үлэлэригэр бюджет үбүн сөпкө туһаныыга бэрэбиэркэ ыытыллыбыт. Олохтоох салайыныы уорганнарын, чуолаан Дьокуускай куорат уонна Уус-Алдан суолу тутууга фондатын, үлэлэрин чэрчилэринэн, икки дьыала силиэстийэлиир уорганнар көрүүлэригэр барбыт. Владимир Птицын бары бэрэбиэркэлэр түмүктэрэ палата хамыыһыйатын быһаарыы ылыныытынан республика Правительствотыгар, Ил Түмэҥҥэ, быраап уорганнарыгар уо.д.а. ыытылларын бэлиэтээтэ.

 

СР Ааҕар-суоттуур палататын отчуотун дьүүллэһиигэ норуот депутаттара Владимир Федоров, Алена Атласова, Виктор Губарев кытыннылар. Сис кэмитиэт чилиэннэрэ отчуоту ылынан, салгыы парламент бюджекка, үпкэ, нолуокка уонна сыана политикатыгар, бас билиигэ уонна приватизацияҕа сис кэмитиэтин көрүүтүгэр ыыттылар.

 

Депутаттар “Саха Республикатыгар муниципальнай сулууспа туһунан” республика сокуонун 10 ыстатыйатыгар уларытыылары киллэрэр сокуон барылын сис кэмитиэт эрдэ бэлэмнээбит бырайыагын бигэргэттилэр. Итинтэн салгыы Василий Местников “Саха Республикатыгар территориальнай общественнай олохтоох салайыныыны сайыннарыы туһунан” Ил Түмэн уурааҕын барылын иһитиннэрдэ. Уураах барылын быһыытынан республика Правительствотыгар территориальнай общественнай олохтоох салайыныыны сайыннарыы Концепциятын оҥорон ылынарыгар, бу тэрилтэлэр үлэлииллэрин хааччыйар үбүлээһини, усулуобуйаны тэрийэригэр, быраап уонна методическай өттүнэн көмөнү оҥороругар этиллэр.

 

Салгыы Василий Местников иһитиннэриитинэн депутаттар “РФ олохтоох салайыныыны тэрийии уопсай принциптэрин туһунан” федеральнай сокуоҥҥа уларытыылары киллэрэр сокуон барылыгар парламент уурааҕын барылын дьүүллэстилэр. “Биһиги бу сокуоҥҥа көннөрүүлэри киллэрии барылын киин куорат Думатын кытта дьүүллэспиппит”, -- диэн туран, кэмитиэт председателэ туох көннөрүүлэр киириэхтээхтэригэр тохтоото.

 

Ити уларытыылар улахан куораттар муниципальнай тэриллиилэрин иһигэр саҥа тэриллиэхтээх оройуоннар (эбэтэр үллэһиллиилэр) нэһилиэнньэлэрин ахсаана төһө буолуохтааҕын, статустарын, быыбарданар уорганнарын дуоһунастаах дьонун, депутаттарын боломуочуйаларын, үлэлиир болдьохторун уо.д.а. боппуруостарыгар сыһыаннаахтар. Ити уураахха парламент олохтоох салайыныыга сис кэмитиэтэ көннөрүүлэри уонна этиилэри ырытан, дьүүллэһэн баран, икки көннөрүүнү наадата суоҕунан устарга быһаараннар, атыттарын бигэргэттилэр. Көннөрүүлэри дьүүллэһиигэ Владимир Прокопьев, Василий Местников, Владимир Федоров уонна да атыттар кытыннылар.

 

Сис кэмитиэт чилиэннэрэ ити көннөрүүлэргэ Ил Түмэн уурааҕын итиэннэ “Потребителлэр бырааптарын көмүскээһин туһунан” РФ сокуонун 44 ыстатыйатыгар уларытыылары киллэрэр федеральнай сокуон барылын көрөн баран, бу сокуоннар барылларын ылынан, парламент сессиятыгар диэри атын кэмитиэттэр уонна куораттар мунньахтарын көрүүлэригэр ыыттылар.