СР Ил Түмэнин тыа сиригэр уонна аграрнай политикаҕа сис комитетын бэрэссэдээтэлэ, биһиги депутаппыт Д.В. Саввин, промышленноска, тутууга уонна ОДьКХ-ҕа комитет бэрэссэдээтэлэ А.А. Романов, олохтоох бэйэни салайыныы комитетын бэрэссэдээтэлэ В.А. Местников Мэҥэ-Алдан, Кириэс Халдьаайы быыбардааччыларын кытары көрсүһүүлэри ыыттылар. Томпо оройуонуттан көрсүһүүгэ оройуон баһылыга Г.Е. Герасимов, райсовет бэрэссэдээтэлэ И.С.Шадрин уо.д.а. кыттыыны ыллылар. Мэҥэ-Алдаҥҥа көрсүһүү саҕаланыытыгар Георгий Евгеньевич Томпо оройуонун бочуоттаах олохтооҕун дастабырыанньатын уонна лиэнтэтин агрооскуола директора А.С. Николаевка туттарда.
Депутаттар комитеттарын үлэлэрин туһунан кэпсээтилэр. Өскөтүн 2014 с. республика тыатын хаһаайыстыбатын сайдыытыгар 6455 мөл. солк. бэриллибит буоллаҕына, быйыл ити сыыппара 7755 мөл. солк. тиийдэ. Табаһыкка саҥа сокуонунан компенсация 20 тыһ. солк. тэҥнэһэр. Үбүлээһин үс өрүттээх буолуоҕа. Ыанньык ынах сүөһүгэ туһата кыра буолан субсидия көрүллүбэтэ. Кэлин 12 сылга аан бастаан Ил Түмэҥҥэ 1 лиитэрэ үүккэ көрүллэр субсидияны улаатыннарыы боппуруоһа көрүлүннэ. Билигин 1 лиитэрэ үүт 30 солк. туттарыллыаҕа. Ону таһынан астыыр кооперативтар үүт туттарааччыларга сайыҥҥы кэмҥэ эбии 6-лыы солк., кыһын 10-нуу солк. 1 лиитэрэ үүккэ төлүүр буолуохтара. Ыччаты тыа хаһаайыстыбатынан дьарыктанар үлэҕэ тардар инниттэн "Саҥа саҕалыыр фермер" диэн Россия Грана олохтонно. Чурапчы оройуонугар эдэр специалистар үлэлиир агрокластердара аһылынна. Бэйэлэрин агрокластердарын Нам уонна Бүлүү оройуоннара аһаары тэринэллэр. Ураты болҕомто агрооскуолалар үлэлэригэр бэриллиэҕэ.
В.А. Местников этэринэн, олохтоох бэйэни салайыныы - бу норуот былааһа буоларын дьон өйдүөх тустаахтар. Олохтоох таһымҥа депутаттарынан былааннаахтык, олохтоох усулуобуйалары уонна кыһалҕалары билэр дьоһун дьон талыллыахтаахтар. Ил Түмэн быыбар туһунан сокуоҥҥа уларытыылары киллэрдэ. Ол курдук, Федеральнай сокуонунан салайтаран муниципальнай тэриллиилэр баһылыктарын депутаттар куоластааһыннарынан эбэтэр нэһилиэктэргэ ыытыллар быһаччы быыбардар түмүктэринэн талыллыахтарын сөп. МТ баһылыктарыгар 13 боломуочуйа хаалар. Нэһилиэнньэ көтөҕөр сөптөөх этиилэрэ өйөнүллэр буолуохтара.
ОДьКХ хайысхатынан быйыл республикаҕа биир даҕаны саҥа хочуолунай тутуллуо суоҕа. Тутууларын 75%-на ыытыллыбыт объектарга үлэлэр түмүктэниэхтэрэ. Саха сиригэр 100 оҕо саадын тутууга аан дойдутааҕы баан үбүлүүргэ сөбүлэһиитэ Россияны утары санкциялар баар буолбуттарынан илии баттаммата. Республикаҕа баар дьиэлэри оскуола иннинээҕи тэрилтэлэргэ уларытан тутуу практиката саҕаланыаҕа. Сылга 10 оскуоланы саҥа тутуу үлэтэ уонна саахалланар туруктаах дьиэлэртэн көһөрүү чэрчитинэн үлэ салгыы ыытыллыаҕа. Дьон көрсүһүүгэ элбэх боппуруостары биэрдилэр: араас тутуулары ыытыы, ууга барбыт оттонор ходуһалар, суоллары өрөмүөннээһин, табаны иитии кыһалҕалара, агрооскуолалар учууталларын хамнастара о.д.а. боппуруостар турдулар. Сорохтор этиилэрин суругунан биэрдилэр.
Маны таһынан Д.В. Саввин уонна В.А. Местников Новай уонна Теплай Ключ нэһилиэнньэлэрин кытта көрүстүлэр.
Евдокия Неустроева. «Томпо Илдьитэ». Олунньу 28 к. 15-16№ 2 стр.
Опубликовано: 3 марта, 2015 - 09:28
Заметили ошибку в тексте? Выделите ее и нажмите Ctrl+Enter, чтобы сообщить об этом администратору.
Спасибо!
Спасибо!