Саха Республикатын народнай депутата, Ил Түмэн бюджекка, үпкэ, түһээн уонна сыана политикатыгар, бас билии уонна приватизация боппуруостарыгар сис кэмитиэтин бэрэссэдээтэлэ Александр Уаров ыам ыйын 15-19 күннэригэр Москва куоракка кэккэ көрсүһүүлэри ыытта.
 
Саха сирин парламенын кэмитиэтин бэрэссэдээтэлэ РФ ФМ Государственнай Думатыгар сылдьан, Госдума бюджекка уонна түһээҥҥэ кэмитиэтин бэрэссэдээтэлин бастакы солбуйааччыларын Глеб Хору уонна Сергей Штогрины кытта көрсүстэ. «Глеб Яковлевич Хор Госдумаҕа үсүһүн талыллан үлэлиир депутат. Манна диэн эттэххэ, кини Дьокуускай куорат 14 №-дээх оскуолатын бүтэрбитэ. Оттон Сергей Иванович Штогрин Госдумаҕа алтыс төгүл талыллыбыт, олус опыттаах депутат буолар, Саха сиригэр хаста да сылдьыбыта», - диэн бэлиэтиир Александр Уаров.
 
Көрсүһүүлэр кэмнэригэр кэккэ дьоһуннаах боппуруостар, олор истэригэр, электроэнергия тарифтарын толуйуу туһунан боппуруос дьүүллэһилиннэ. «Электроэнергетикаҕа тариф тиһигэ өссө 2009 сыл атырдьах ыйыгар, Владимир Путин Мирнэйгэ кэлэ сырыттаҕына көрүллүбүтэ. Кини онно Саха сирин өттүттэн уотунан хааччыйыыны кииннэммит уонна кииннэммэтэх оройуоннарга тарифтары араарыы туһунан киллэриллибит этиилэри өйөөбүтэ. Уотунан ойдом хааччыллыылаах оройуоннар нэһилиэнньэлэригэр харчынан көмө - субсидия көрүллэрэ наадалааҕа бэлиэтэммитэ. Ол соругу толорууга федеральнай бюджеттан сылга 4 млрд. солкуобай кэриҥэ киирэрэрэ ирдэнэр», - диир Александр Уаров.
 
Кини этэринэн, федеральнай бюджекка ити үп киирбэтэҕэ. «Ол оннугар быйыл биһиги ветераннарга (52 мөл.солк.) уонна сапааска тахсыбыт байыаннай сулууспалаахтарга (82 мөл.солк) олорор дьиэ тутуутугар эбии үбү ылыахтаахпыт. Ол курдук, быйыл күһүн, арааһа, биһиги да республикатааҕы бюджеппытыгар уларытыылары киллэрдэхпитинэ сатанара буолуо», - диир Ил Түмэн бюджекка кэмитиэтин баһылыга.
 
Маны тэҥэ, Александр Уаров «АЛРОСА» хампаанньа президенэ Федор Андреевы кытта көрсөн, кэккэ боппуруостары дьүүллэстэ. Кэпсэтии биир түгэнинэн Саха сирин алмаастаах провинциятын улуустарын боппуруостара, ол иһигэр, дивиденнэри – акциялар ахсааннарынан көрөн түҥэтиллэр барыс үбү, төлөөһүн уонна ол кээмэйин, итиэннэ республикатааҕы бюджекка нолуоктан уонна атын сиртэн киирэр үбү кытта сибээстээх боппуруостар буоллулар. Маны таһынан, саха маҥнайгы алмааһа булуллубут Сунтаар улууһун Кириэстээх сэлиэнньэтигэр оскуола саҥа таас дьиэтин туттарыы боппуруоһа дьүүллэһилиннэ. «Алмаас хампаанньатын президенин кытта алмаас промышленноһыгар олохтоох нэһилиэнньэттэн, ол иһигэр, алмаастаах провинция улуустарыттан тустаах эдэр кадрдары бэлэмниир туһунан кэпсэтии барда», - диир Александр Уаров.
 
Москваҕа командировкаҕа сылдьан Александр Уаров Саха сирин президенин Егор Борисовы, правительство бэрэссэдээтэлин Галина Данчикованы, бастакы вице-премьеры Алексей Стручковы, Ил Түмэн Федеральнай Муньахха бастайааннай бэрэстэбиитэлин Георгий Балакшины, РФ Президенин иһинэн республика бастайааннай бэрэстэбиитэлин Александр Акимовы кытта көрсөн үлэлээтэ. «Республика 2011 сыллааҕы бюджетын толоруу туһунан отчуоту кытта сибээстээх боппуруостар көрүлүннүлэр. Отчуоту биһиги бэс ыйын 8 күнүгэр ыытыллар пленарнай мунньахха көрүөхпүт, оттон ол иннинэ ыам ыйын 30 күнүгэр видеоконференция быһыытынан ыытыллар публичнай истиилэр буолуохтара», - диэн бэлиэтээтэ Ил Түмэн бюджекка кэмитиэтин бэрэссэдээтэлэ.
 
Ил Түмэн пресс-сулууспата