Дойдуга да, биһиги республикабытыгар да оҕоҕо туһуламмыт кырбааһын, күүһүлээһин, өлөрүү курдук ыар буруйдар күннэтэ тахса тураллар. Оҕолору итинник дьайыылартан көмүскүөххэ, буруйдаахтары кытаанахтык накаастыахха диэн ыҥырыылаах миитин ыам ыйын 29 күнүгэр буолла.
Дьокуускай куорат килбэйэр киинигэр, Ленин аатынан болуоссакка 60-ча киһи муһунна. Миитини тэрийээччилэр — «Надежда России» Бүтүн Россиятааҕы Дьахталлар сойуустарын Саха сиринээҕи салаата, коммунистар, «Эйгэ» экологическай сырдатыы киинэ. Оҕо көмүскэлин күнүн көрсө маннык миитин 2006 сыллаахтан ыытыллар.
Миитиҥҥэ Ил Түмэн депутаттара Саргылана Гоголева, Виктор Губарев, Георгий Артемьев, Вячеслав Куличкин, Коррупцияны утары общественнай кэмитиэт чилиэнэ Анна Каженкина, кылаабынай пионербаһаатай Людмила Иванова, 32 №-дээх партийнай тэрилтэ сэкирэтээрэ Светлана Сивцева, тыыл уонна үлэ бэтэрээнэ Зинаида Ахмадиева, «Эйгэ» киин салайааччыта Екатерина Евсеева уонна да атыттар тыл эттилэр.Чаас устата ыытыллыбыт миитин түмүгүнэн, РФ Госдуматыттан саҥа социальнай политиканы, республика салалтатыттан оҕо аймаҕы көмүскүүр тус сыаллаах программаны, ис дьыала, силиэстийэ уорганнарыттан оҕолорго туһуламмыт холуобунай дьыалалары тиһэҕэр тиэрдэри туруорсар ис хоһоонноох резолюция ылылынна.
Вера Макарова, «Саха сирэ» хаһыат
Дата последнего изменения: 12 декабря 2018, 15:01