Тэрээһиҥҥэ Ил Түмэн дьиэ кэргэн, оҕо аймах, ыччат дьыалаларыгар, физкультураҕа уонна спортка сис кэмитиэтин бэрэссэдээтэлэ Сергей Сюльскай, культура уонна духуобунай сайдыы министрин солбуйааччы Михаил Донской, үөрэх министрин солбуйааччы Евдокия Никифорова, урбаан дьыалаларыгар уонна туризм сайдыытыгар министр солбуйааччыта Александр Андросов, тыа хаһаайыстыбатын уонна ас-үөл политикатын, транспорт уонна суол хаһаайыстыбатын министерстволарын, Роспотребнадзор республикатааҕы управлениетын, парламент аппараатын бэрэстэбиитэллэрэ кытыннылар.

 

Бастаан, ыам ыйын 29 күнүгэр тэрийэр кэмитиэт чилиэннэрэ Ыһыах ыалдьыттарын түһэрэр уонна аһатар объектарга, «Кыталыктаах» комплекска сырыттылар, тутуу хаамыытын кытта билсистилэр. Ыам ыйын 30 күнүгэр оройуоннааҕы тэрийэр кэмитиэти кытары холбоһуктаах мунньаҕы Ил Түмэн вице-спикерэ Александр Жирков салайан ыытта.

 

Ньурбаҕа Олоҥхо Ыһыаҕа бэс ыйын 23-24 күннэригэр, Дьокуускайдааҕы Туймаада Ыһыаҕын кытта биир кэмҥэ, буолуохтаах. Мунньахха этиллибитинэн, билиҥҥи туругунан, 10 улуус официальнай делегацията кэлэрэ бигэргэтиллибит, атын улуустартан кэлиэхтээх ыалдьыттар ахсааннарын чуолкайдыырга үлэ салҕанан барар. Күн бүгүн 2400-тэн тахса ыалдьыт түһэр миэстэтэ, ханна аһыахтаахтара быһаарыллыбыт.

 

Ыһыахха Саха Республикатын президенэ Егор Борисов кэлэн кыттара күүтүллэр. Кини ыам ыйын 26 күнүгэр Российскай Федерация Геройа, летчик-космонавт Дмитрий Кондратьевы кытта кірсүһэн Олоҥхо Ыһыаҕар ыҥырбыт. Ньурба 2 №-дээх оскуолатыгар үірэнэ сылдьыбыт космонавт оҕо сааһа ааспыт дойдутугар кэлэргэ сібүлэспит, билигин кини графигын манна сылдьарын курдук сіп түбэһиннэриллэр.

 

Мунньахха Александр Жирков Ньурба куораты тупсаран оҥоруу уонна ыраастааһын үлэтин түмүгүнэн астымматаҕын биллэрдэ, үлэ тэтимин күүһүрдэргэ сорук туруорда. Кини Олоҥхо Ыһыаҕын тэрээһинин үлэтэ сүнньүнэн үчүгэйдик баран иһэрин, тутуу үлэтигэр сыһыаннаан бэс ыйын 20 күнүгэр диэри Кыталыктаахха бары объектар бүтэн бэлэм буолуохтаахтар диэн тоһоҕолоото.

 

Олоҥхо Ыһыаҕар 36 эдэр уонна аҕам олоҥхоһуттар кытталлара быһаарыллыбыта. Ньурбаҕа Тааттаттан, Өлүөхүмэттэн, Мэҥэ-Хаҥаластан, Намтан, ¥өһээ Бүлүүттэн, Уус-Алдантан, Чурапчыттан, Сунтаартан, Горнайтан, Бүлүүттэн, Дьокуускайтан норуот уус-уран айымньытын маастардара кэлиэхтээхтэр.

 

Ыһыах кэмигэр саха атаҕын оонньуутугар, мас тардыһыытыгар, хапсаҕайга күрэхтэһиилэр ыытыллыахтара. «Эр бэрдэ» диэн күүстээхтэр, сымсалар күрэстэрэ дьон болҕомтотун тардыа. Кыттааччылар «Сыарҕа соһуута», «Модун таастара», «Илии күүһэ», «Балаҕан нөҥүө таас быраҕыы», «Бэрэмэдэйдээх сүүрүү», «Халбас харата», «Таас көтөҕүү» курдук түһүмэхтэри ааһыахтара. Ыччат өттө «¥рүҥ Уолан» күрэххэ туспа программанан күүс холонуо: мас тардыһыыта, сүүрүү, ыстаҥа, тутум эргиир, хапсаҕай. Бырааһынньык спортивнай чааһа ат сүүрдүүтүнэн түмүктэниэ.

 

Быйылгы Олоҥхо Ыһыаҕын сүрүн уратыта – саамай уһун тыыннаах үҥкүүгэ Россия рекордун олохтооһун. Бэлэмнэнии үлэтэ тиһигин быспакка барар. Ыам ыйын 22 күнүгэр Ньурба киин пааркатыгар тыһыынча кэриҥэ киһи мустан, оһуохайы оройуттан туттулар. Ол иннинэ Улуу Кыайыы күнүгэр эмиэ оһуохайга рекорд олохтооһунугар бэлэмнэнии буолбута. Ол күн Хотун Бүлүү кытылыгар кырдьаҕастары сэргэ, оҕо-эдэр дьон көхтөөхтүк кыттыбыттарын бэлиэтииллэр.