Общественнай приемнайдар салалта, былаас, депутаттар нэһилиэнньэни кытары ыкса ситимнээхтик үлэлиир биир көрүҥнэрэ буолар. Аҕыйах сыл иһигэр үлэ маннык көрүҥэ бэйэтин көдьүүһүн дакаастаата дии саныыбын. Нэһилиэнньэ кыайан быһаарыллыбатах боппуруостарыгар сүбэ-ама, өйөбүл, көмө ылан, үгүстэр биһирээтилэр.
 
Ити общественнай приемнайдарга суруйтарар дьон ахсаана элбээбититтэн уонна туруорсар боппуруостарын ис хоһооно дириҥээн иһэриттэн көстөр. Ыам ыйын 30-31 күннэригэр Ил Түмэн бэрэссэдээтэлин солбуйааччы Александр Жирков общественнай приемнайа үлэлээтэ.
 
Бастакы күн норуот депутатыгар алта киһи кыһалҕалаах боппуруостарын туруоруста. Өр кэмҥэ биэкэринэн үлэлээбит Пелагея Горелая сир учаастагын боппуруоһун туруоруста. 2006 сыллаахха киниэхэ Дьокуускайга сир учаастагын биэрбиттэр. Манна кинилэр дьиэ туттубуттар. Уоттарын иһин төлөбүрү кэмиттэн-кэмигэр төлөөн испиттэр. Ааспыт сыллаахха ити учаастактарын Дьокуускай куорат дьаһалтата атын киһиэхэ биэрбит. Общественнай приемнайга кини сирин учаастагар докумуона ситэтэ суоҕа көһүннэ. Ил Түмэн бэрэссэдээтэлин солбуйааччы Александр Жирков бэтэрээн сирин учаастагын докумуонун оҥоһуутугар көмөлөһүөҕүн туһунан эттэ.
 
Иккис группалаах инбэлиит, музыка, саха тылын уонна литературатын учууталларынан үлэлээбит Макар Крылов 180 тираһынан тахсыбыт “Күөрэй дуу, күөрэгэй чыычааҕым” диэн ноталаах ырыанньыгын эбии бэчээттэтэн таһаарар боппуруоһу депутаттан туруоруста.
 
Мария Охлопкова диэн ытык кырдьаҕас аатыттан аймаҕа Туйаара Колесова “Социальная инициатива” диэн тэрилтэҕэ дьиэ ылаары албыннаппыт сууматын хайдах төннөрөр туһунан кыһалҕатын үллэһиннэ. Александр Николаевич толуйуу харчы төннөрүллүүтүн хонтуруоллаһыам диэн эрэннэрдэ.
 
Кыһалҕалаахтар ортолоругар өрөспүүбүлүкэтээҕи лицейгэ туттарсан киирэр баала үрдүк эрээри кыайан киирбэтэх, математикаҕа дьоҕурдаах үөрэнээччи аҕата эмиэ баар.
 
Суорун Омоллоон аатынан Опера уонна балет театрын солистката Зинаида Колодезникова салгыы идэтин хайдах быһыылаахтык үрдэтиигэ уонна клип уһулууга депутаттан сүбэ-ама ылла.
 
Өрөспүүбүлүкэ кинематографистарын Союһун бэрэссэдээтэлэ Иннокентий Аммосов уонна эдэр талааннаах киинэ режиссера Михаил Лукачевскай олоҥхо тиэмэтигэр киинэ бырайыагын кытары билиһиннэрдилэр.АН.Жирков тустаах бырайыагы сиһилии үөрэтэн көрүөм диэн ылла.
 
Ыам ыйын 31 күнүгэр Ил Түмэн бэрэссэдээтэлин солбуйааччы Александр Жирков түөрт киһини приемнаата. Кинилэр ортолоругар олорор дьиэ, үлэ боппуруоһун туруорсааччылар, ону таһынан Ил Түмэн бастакы спикерэ Афанасий Илларионов төрөөбүтэ 70 сыллаах үбүлүөйүн тэрийии уонна ити үбүлүөйгэ аналлаах ыһыаҕы ыһыы тустарынан боппуруостарга сүбэ-ама ылааччылар бааллар. Аллараа халымалар көһө сылдьар оскуола туһунан санаа атастаһа кэлбиттэр. Мантан көстөрүнэн, общественнай приемнайга тус кыһалҕаларын эрэ буолбакка, туруорсааччылар боппуруостара дириҥээн, общественнай хабааннанан иһэрэ киһини үөрдэр.
 
Людмила Ноговицына, «Ил Тµмэн» ха´ыат