Ыһыах үгэс быһыытынан сахалыы алгыстан, арчы сиэриттэн-туомуттан саҕаланна. Олохтоох маастардар оҥоһуктарын атыы-быыстапката үлэлээтэ.

 

Мытаах музей-галереятыгар ини-бии Даниловтар музейдарын, Афанасий Осипов галереята аһыллан дьон-сэргэ болҕомтотун тартылар.

 

Саха народнай поэта Семен Данилов 95 сааһыгар, саха народнай суруйааччыта Софрон Данилов 90 сааhыгар анаммыт үбүлүөйдээх Ыһыах арыллыытын сиэрин-туомун кэмигэр «Мин кэллим дойдубар» театрализованнай дьүһүйүү буолла.

 

Ини-бии Даниловтарга аналлаах Ыһыахха кытта Дьокуускайтан, республика араас муннуктарыттан ыҥырыылаах ыалдьыттар кэлбиттэр: Саха Республикатын народнай депутаттара Семен Олесов, Егор Жирков, федеративнай сыһыаннаһыыларга уонна тас сибээстэргэ министр Валерий Максимов, үлэҕэ уонна социальнай сайдыыга министр Николай Дегтярев, Горнай улууһун баһылыга Петр Алексеев, «Саха сирэ» хаһыат кылаабынай редактора, Саха сирин суруйааччыларын союһун бэрэссэдээтэлэ Наталья Харлампьева, Саха народнай худуоһунньуга Афанасий Осипов уонна да атыттар.

 

Государственнай Мунньах (Ил Түмэн) Хонтуруоллуур кэмитиэтин бэрэссэдээтэлэ Семен Олесов Горнай улууһун кураторынан буолар. Кини мустубут дьону-сэргэни үрүҥ тунах Ыһыаҕынан эҕэрдэлээн туран, парламент наҕараадаларын туттарда. Улуустааҕы депутаттар сэбиэттэрин бэрэссэдээтэлэ Юрий Пахомов Государственнай Мунньах (Ил Түмэн) Бочуоттаах грамотатынан уонна кыһыл көмүс чаһынан наҕараадаланна. Горнай улуус баайга-дуолга, сиргэ сыһыаннаһыыларыгар управлениетын специалиһа Анна Александроваҕа Ил Түмэн бэрэссэдээтэлин махтала биллэрилиннэ, үрүҥ көмүс бэлиэтэ туттарылынна.

 

Оҕолорго аналлаах туспа программа чэрчитинэн «Оҕо саас көрдөөх күйгүөрэ» кэнсиэр, «Тунах үрүмэччитэ буоламмын сир симэҕин ситэрсиэм» уус-уран оҥоһуктар быыстапкалара буоллулар. Оҕолорго өбүгэ оонньуулара, оһуохай күрэҕэ ыытылыннылар.

 

«Yс эр бэрдэ» күүстээхтэр күрэхтэрин сүрүн соруктара – өбүгэ үгэстэрин көҕүлээһин, тэнитии, сайыннарыы, саҥа ааттары арыйыы, улуу суруйааччылар ааттарын үйэтитии. Күрэххэ үстүү киһиттэн турар хамаандалар кытыннылар, хас биирдии хамаандаҕа 17-тигэр диэри саастаах уол оҕо, 18-34 саастаах эдэр киһи уонна 35-тэн аҕа саастаах эр киһи киирэллэр. «Тутум эргиир», «Сиинэ таастара», «Үс төгүл үс», «Оҕунан ытыы», «Таас көтөҕүү», «Эстафетанан сүүрүү» диэн алта түһүмэх түмүгүнэн кыайыылаахтар билиннилэр.

 

«Ыллыахха, туойуохха, оҕо сааһым кэнчээрилээх сыһыытыгар» бырааһынньыктааҕы эҕэрдэ кэнсиэр дьон болҕомтотун тарта. «Сүгүрүйэбит, сүдү дьоммутугар!» диэн ини-бии Даниловтар музейдарыгар ыалдьыттарга ахтыы тэрээһин буолан ааста.

 

«Оһуохай оонньуулаах түhүлгэтэ» оһуохайдьыттар күрэхтэрэ, саха народнай поэта Семен Данилов тылларыгар ырыалары толорууга «Киһиэхэ төpөөбүт дойдута» республикатааҕы ыччат күрэҕэ үрдүк таһымнаахтык тэриллибиттэр.

 

Ыһыах түмүктэниитэ «Сүрэх тэбэрин тухары» искусство маастардарын кэнсиэрэ буолан ааста.