Ыһыах ытык ыалдьыттарынан М.К. Аммосов кыыһа Лена Аммосова, Саха Республикатын народнай депутаттара – Государственнай Мунньах (Ил Түмэн) бэрэссэдээтэлин солбуйааччы Александр Жирков, парламент дьиэ кэргэн, оҕо-аймах уонна ыччат дьыалаларыгар, физкультураҕа уонна спортка сис кэмитиэтин бэрэссэдээтэлэ Сергей Сюльскай, депутаттар Александр Гаврильев, Николай Румянцев, «Биир ньыгыл Россия» партия Саха сиринээҕи региональнай салаатын толоруулаах кэмитиэтин салайааччыта Сахамин Афанасьев, улуус бочуоттаах олохтоохторо уо.д.а. буоллулар.

 

Ханнык баҕар ыһыахха норуот олоҕун оҥорсо, дьон интэриэстэригэр үлэлии-хамсыы сылдьар салайааччылар тыллара-өстөрө, эҕэрдэлэрэ оруннаах буолар.

 

Бу ыһыахха Александр Жирков этиитэ бэлиэ буолла. Ол курдук, норуот талбыт депутата саха норуота государственностаах буолуутугар, дойдубут сайдарыгар, тупсарыгар олоҕун толук уурбут Максим Кирович Аммосов төрөөбүтэ 115 сылын бэлиэтээһин Нам сирин кытта ситимнээх, диэн бэлиэтээтэ.

 

«Биһиги, саха дьоно, кэнники кэмнэргэ буолбут саха дьылҕатын уларыппыт 20-с уонна 21-с үйэлэр кирбиилэригэр саамай сөпкө уонна дьоһуннаахтык дьаһаммыт дьыалабытынан тугуй диэн ыйыттахха, арааһа, кэнэҕэһин кэнэҕэс этэллэрэ буолуо, биһиги норуоттарын туһугар олохторун толук уурбут дьоммутун үрүҥҥэ-кыһылга араарбакка, барыларын сыа-сым курдук тэҥҥэ тутан кинилэр ааттарын ааттаан, кинилэр сырдык кэриэстэригэр сүгүрүйэн дьаһаныыбыт норуот быһыытынан муударайбытын көрдөрөр уонна кэскиллээхпитин кэрэһэлиир», - диэтэ Александр Жирков.

 

Кини кэпсээбитинэн, М.К. Аммосов аатын үйэтитиигэ билигин Саха Республикатын уонна Россия үрдүнэн балайда үлэ ыытылла сылдьар.

 

«Соторутааҕыта Москваҕа СР бэрэстэбиитэлистибэтигэр Максим Аммосов пааматынньыга туруорулунна. Кыргызстан киин куората Бишкеккэ М.К. Аммосовка пааматынньык туруоруу үлэтэ түмүктэнэн эрэр. Мин саныахпар, барыта этэҥҥэ буоллаҕына балаҕан ыйын бүтүүтэ пааматынньык туруоруллуоҕа. Онно СР президенэ салайааччылаах делегация барыаҕа уонна Нам улууһун дьоһун дьоно киириэхтэрэ. Пааматынньыгы билигин Кыргызстан биллиилээх скульптора оҥорон бүтэрэн эрэр. Онон 3 метр үрдүктээх Максим Аммосовка анаммыт кыһыл граниттан оҥоһуллубут пааматынньык балаҕан ыйыгар түмүктэнэн, кинини кыргыз уонна саха норуота холбоһон үйэтитиэхпит диэн эрэнэбин. Мин пааматынньык кутулла сылдьар тааһыттан плита оҥорон аҕалбыппын бүгүн Хатырыкка баар государственность музейыгар туттарабын», - диэтэ Ил Түмэн вице-спикерэ.

 

Нам улууһун дьонун-сэргэтин самаан сайын ыһыаҕынан эҕэрдэлээн баран, Александр Жирков «Барыта этэҥҥэ буоллун, инникибит кэскиллээх буоллун, хас биирдиигит дьоллоох олохтонуҥ» диэн баҕа санаатын эттэ. Ол кэннэ депутат Нам улууһун дьаһалтатын олохтоох администрациялары кытта үлэҕэ отделын начальнига П.Р. Михайловка уонна Хатыҥ Арыы нэһилиэгин баһылыга Ю.И. Слепцовка Государственнай Мунньах (Ил Түмэн) бэрэссэдээтэлин махтал суругун туттарда.

 

Сыана политикатыгар государственнай кэмитиэт бэрэссэдээтэлэ Валентина Лемешева илиититтэн СР президенэ Е.А. Борисов бочуотунай грамотатын „Бережнева” бааһынай хаһаайыстыба салайааччыта, Үөдэй олохтооҕо А.Б. Бережнева, Хатырык нэһилиэгин землеустроитела А.Н. Попов ыллылар.

 

Ыһыах аһыллыытын дьүһүйүүтүгэр кыталык кыргыттар, эрэкэ-дьэрэкэ оҕолор, дьоһун-мааны хомусчуттар тахсыталаатылар. Улуус бары нэһилиэктэриттэн сүүмэрдэммит сынньалаҥ киин, биирдиилээн дьон-сэргэ күүһүнэн туруоруллубут Саха сирэ Россия састаабыгар киирбитэ 380, М.К. Аммосов төрөөбүтэ 115, Саха сирин автономията төрүттэммитэ 90, сомоҕолоһуу уонна доҕордоһуу сылларыгар анаммыт сиэри-туому олус бэркэ дьүһүйэн көрдөрдүлэр.

 

Үрүҥ тунах ыһыах аһыллыыта оһуохайынан түмүктэннэ. Оһуохайга үгүс киһи кытынна. Кэрэхсэбиллээҕэ, үксүлэрэ сахалыы таһастаахтар. «Дьүрүл» ансаамбыл салайааччыта Д.И. Кривошапкин оһуохай сүргэтин көтөҕөн, дьикти-кэрэ дьүһүлгэни салайан таһаарда. Күн иккис аҥарыттан араас күрэхтэр, ырыа-тойук оройуттан тутулунна.