Уус Алдан улууһа үүнэригэр-сайдарыгар олук уурбут, өрөспүүбүлүкэ үрдүнэн үтүө аата-суола тарҕаммыт “Лена” сопхуос төрүттэммитэ 50 сылыгар анаммыт үбүлүөйдээх ыһыах бэс ыйын 23 күнүгэр Суотту нэһилиэгэр буолла.
Самаан сайыммыт муҥутуур куйаас күнүгэр, күн уотугар 33 кыраадыс итии буолбутун аахсыбакка, Суотту нэһилиэгин олохтоохторо, Курбуһах, Тумул, Бороҕон, Бэрт Ууһун, Өлтөх нэһилиэктэриттэн ыҥырыллыбыт ыалдьыттар муһуннулар.